ABD Kyivniñ Qırımdaki Rusiye arbiy obyektlerine Amerika silâsınen ücüm etüv areketlerini sıñırlamay, dep bildirdi Ukrayınanıñ ABD elçisi Oksana Markarova «Yevropeyska pravda» Ukrayına saytına.
«Qırım – Ukrayınadır. Öyle edi, şimdi öyle ve öyle olacaq. Şunıñ içün ABD tarafından Qırımda (silâ qullanıluvınen bağlı – muar.) bir sıñırlav yoq. Ortağımız ABD qanınsız Qırım ilhaqı ve işğalini bir vaqıt tanımadı. Qırım – er ceetten Ukrayınadır», – dedi Markarova.
Avgust ayında Ukrayına mudafaa naziri Oleksiy Reznikov Ukrayınanıñ ğarbiy ortaqlardan Qırımdaki Rusiye arbiy obyektlerine ücüm etüv yasaqları yoq, dep bildirdi.
Sentâbrniñ 7-nde Ukrayına Silâlı quvetleriniñ baş komandanı Valeriy Zalujnıy 2022 senesi avgust ayında Qırımdaki Rusiye arbiy obyektlerine qarşı Ukrayına arbiyleriniñ raketa darbelerini tanıdı. Ukrayına mudafaa nazirligi qırımlılarnı Qırımdaki Rusiye ordularınıñ yerlerini «eVoroğ» çat-botuna bildirmege çağırdı.
The New York Times neşiri Ukrayına memurınıñ malümatına esaslanıp, Qırımdaki patlavlar «elit Ukrayına arbiy bölügi» yardımınen kerçekleştirildi, dep bildirdi. Memur gizli qalmaq şartınen laf etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
