Ukrayına prezidenti Volodımır Zelenskıy Rusiye Avropanıñ eñ büyük atom elektrostantsiyası olğan Zaporijjâ atom elektrostantsiyasında terakt yapuv stsenariyini baqa, dep bildirdi, Kyiv bu malümatnı ortaq memleketlerine berdi. Bu aqta prezident Ukrayına istihabaratı ve Ukrayına telükesizlik hızmetiniñ maruzasından soñ bildirdi.
«İstihbaratımız ve Ukrayına telükesizlik hızmeti maruza yaptı. İstihbaratımız alğan malümatqa köre, Rusiye Zaporijjâ atom elektrostantsiyasında terroristik akt stsenariyini baqa – radiatsiyalı terror ücümi. Er şey azırlağanlar. Ne yazıq ki, endi hatırlatqanım kibi, radiatsiya devlet sıñırlarını bilmey ve kimge tesir etecegini tek yel yönelişi belgiley», – dep ayttı o, video muracaatında.
Zelenskıy qayd etkenine köre, Ukrayına ortaqlarına bütün malümatnı bere.
«Avropa, Amerika, Qıtay, Braziliya, İndistan, arap dünyası, Afrika – bütün memleketler bunı bilmeli. Halqara teşkilâtlar. Er kes. İç bir vaqıt, iç bir yerde atom stantsiyalarında terakt yapılmamalı. Bu sefer Kahovkada olğanı kibi olmamalı: dünya haberdar, dünya areket etmeli», – dep qoştı o.
Ukrayına Mudafaa nazirligi Baş istihbarat idaresiniñ reberi Kırılo Budanov bildirgenine köre, Rusiye ordusı Zaporijjâ atom elektrostantsiyasına mayın qoydı.
Rusiye ordusı Energodar şeerini ve yaqındaki Zaporijjâ atom elektrostantsiyasını 2022 senesi fevralniñ soñunda işğal etken edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
