Ukrayına arbiyleri bir künde Rusiye Federatsiyasınıñ ordusını 20-den çoq mesken yerden çıqardı, dep bildire Ukrayına Silâlı quvetleriniñ Baş ştabı.
«Keçken künü Mudafaa quvetleri duşmannı yigirmiden çoq mesken yerden çıqarıp oldı. Kontrol altına alına ve stabilleştirüv tedbirleri keçirile», – dep aytıla haberde.
Ukrayına Silâlı quvetleriniñ Baş ştabı qayd etkenine köre, Harkiv ve Donetsk vilâyetlerinde mesken yerler Rusiye arbiylerinden temizlene.
«Daa evel berilgen malümatqa köre, Rusiye ordusı çekilip, mevzilerini taşlay ve vaqtınca zapt etilgen topraqlarğa ya da Rusiye Federatsiyasına qaça. Böyle devam ete. Keçken künü işğalciler Harkiv vilâyetindeki Velıkıy Burluk ve Dvureçna mesekn yerlerinden yerli sakinlerden hırsızlağanlarını alıp ketti», – dep bildirdi Ukrayına Silâlı quvetleriniñ Baş ştabı.
Bundan ğayrı, Ukrayına Silâlı quvetleri bildirgenine köre, Luğansk vilâyetinde Rusiye arbiyleri qorantalarınen beraber Svatovonı terk etti, tek yerli sakinlerden «milliy milis» arbiyleri qaldı.
Faal cenk uruşları vaqtında zıddiyet taraflarınıñ malümatını mustaqil menbalarda teşkermek imkânsız.
Harkiv vilâyetiniñ arbiy memuriyeti bildirgenine köre, Ukrayına arbiyleri Harkiv vilâyetiniñ 40-tan çoq mesken yerini işğalden azat etti.
Rusiye Mudafaa nazirligi sentâbrniñ 10-nda Rusiye ordusı çekilgenini aytıp, bunı «yañıdan gruppalaşuv» dep adlandırdı. Harkiv vilâyetinde Ukrayınanıñ qarşı ücümi neticesinde onlarnen mesken yer azat etildi.
Pentagon Ukrayına quvetleri eki qarşı ücümde cenk meydanında muvafaqiyetini köstere, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
