Aqmescit SİZOsında tutuğan, Qırımda diversiya azırlanmasında qabaatlanğan Vladimir Dudkanıñ ciddiy sağlıq problemaları bar. Bunı sentâbr 12-sinde Qırım.Aqiqatqa onıñ qardaşı Pötr Dudka her etti.
“Cuma künü (sentâbr 7 - Q.A.) oğlu onı SİZOda ziyaret etti. Soñ malümatqa köre, onıñ prostata hastalıqları bar. O soñki sefer daa 2014 senesi hastahanede baqıldı. Oña yollağanımız ilâclar tek vaqtınca ağrını ala. Olarnıñ endi faydası az, oña yañıdan baqılmaq kerek. Ekinciden - aşqazanı raatsızlay. Oña gastroenterolog ekimi kerek. Ve üçüncisi- yüregi, onıñ kardiologğa ihtiyacı bar. Bundan ğayrı, onıñ bütün vaqıt başı ağıra”, - dedi Pötr Dudka.
Onıñ aytqanına köre, Vladimir Dudka, onı mahküm etseler ve koloniyağa yollasalar - bu “bir taraflı bilet” olacaq dep saya.
İyülniñ 31-inde Kreml nezareti altındaki Aqyar şeer mahkemesi Vladimir Dudka ve Aleksey Bessarabovnıñ apis müddetlerini 6 ayğa uzattı. Olar Qırımda diversiya azırlamasında qaatlandı.
2016 senesi noyabrniñ 9-da Aqyarda «Ukraina Mudafaa nazirligi baş istihbarat idaresiniñ diversion-terroristik gruppasınıñ azaları» Dmitriy Ştıblikov, Aleksey Bessarabov ve Vladimir Dudka yaqalanğan ediler.
2017 senesi noyabrniñ 16-sında Aqyar şeer mahkemesi Ştıblikovnı 5 yıllıq şiddetli rejim koloniyasına ve 200 biñ rublelik (95 biñ grivna) para cezasına mahküm etti.
Ukraina havfsızlıq hızmeti Qırımda tutulğan Ukraina vatandaşları SBU ne hadimleri, ne habercileri olmağanını bildirdi.
