ABD prezidentiniñ mahsus vekili Steve Witkoff fevralniñ 17-nde Jenevada Ukrayina ve Rusiye arasındaki üç taraflı muzakerelerden soñ "büyük ilerilev" oldı, dep bildirdi.
"Prezident Trumpnıñ bu cenkniñ eki tarafını da cep etmesi büyük ilerilev yaptı, ve biz bu qorqunç zıddiyetni toqtatmaq içün onıñ idaresi altında çalışqanımızdan ğurur duyamız. Eki taraf da liderlerine haber bermege ve añlaşma tizmek içün çalışmağa devam etmege razı oldı", – dep yazdı Witkoff muzakereler neticesinde X içtimaiy ağında.
Ukrayina eyyetiniñ yolbaşçısı, Milliy telükesizlik ve mudafaa şurasınıñ kâtibi Rustem Umerov fevralniñ 17-nde Jenevada üç taraflı muzakerelerniñ birinci künü "ameliy meseleler ve ola bilecek qararlarnıñ mehanikasına" bağışlandı. MTMŞ ktâibi ABD eyyetine "konstruktiv işbirligi ve iş süratında çalışmağa azır olğanları içün" teşekkürler bildirdi.
Umerov Jenevada üç taraflı muzakerelerniñ ilk kününden soñ ABD ve Avropa ortaqlarınen (Frenkistan, Büyük Britaniya, Almaniya, İtaliya ve İsveçre) de ayrı körüşkenini bildirdi.
"Muzakerelerniñ bugünki raund neticelerini muzakere ettik ve ilerideki adımlarğa yanaşuvlarnı sinhronlaştırdıq. Ukrayina, ABD ve Avropa arasında areket koordinatsiyasını saqlamaq müim. Netice içün umumiy mesüliyet añlaşıla. Çalışmağa devam etemiz", – dep yazdı Umerov içtimaiy ağlarda.
Fevralniñ 17-nde Jenevada ilk künü muzakerelerniñ siyasiy bloku yekünlendi, dep haber etildi. Washingtondaki menbalar Azatlıq Radiosına bildirgenine köre, Büyük Britaniya, Frenkistan, Almaniya ve İtaliyanıñ milliy telükesizlik mesleatçıları muzakerelerni közetti.
Rusiye kütleviy haber vastaları Rusiye eyyetindeki menbasınıñ aytqanlarını bildirip, muzakereler altı saat devam etti ve "pek kergin" edi, dep haber etti.
Körüşüvler Rusiyeniñ fevralniñ 17-ne keçer gecesi Ukrayinağa qarşı 29 raketa ve 396 darbe uçucısızınen ücümi vaqtında keçe.
Fevralniñ 4-5-nde Birleşken Arap Emirlikleriniñ paytahtı Abu-Dabide ABD aracılığınen Rusiye ve Ukrayina arasında cenkni bitirüv yollarınen bağlı üç taraflı muzakerelerniñ nevbetteki raundı keçti. Fevralniñ 5-nde olğan körüşüv neticesinde eyyetler cenk esirlerini deñişüv añlaşmasını yaptı – soñki beş ayda ilk deñişüv oldı.
ABD prezidentiniñ mahsus vekili Steve Witkoff fevralniñ 4-nde ve 5-nde olğan munaqaşalarnı "turğun barışıq içün şaraitler nasıl olacağına dair tam" dep adlandırdı. O, Abu-Dabideki körüşüvlerde ateş toqtatıluvı muzakere etildi, dep haber etti.
ABD devlet kâtibi Marco Rubio fevralniñ 4-nde olğan muzakereler neticesinde Ukrayina ve Rusiye arasında barışıq añlaşmasınen bağlı açıq meseleler eksildi, amma eñ "zor" meseleler qala, deyep ayttı. Yanvarniñ 28-nde Rubio topraq meselesi çezilmey qala, dep ayttı.