Rusiye ordusı İzüm şeeriniñ merkezine raketa darbesini endirdi. Bu aqta Harkiv vilâyet memuriyetiniñ yolbaşçısı Oleg Sinegubov bildirdi.
Bu ücümde beş insan öldi, 38 kişi yaralandı. Yaralanğanlar arasında cam yarası alğan 15 yaşında qızçıq da bar.
Şeer yolbaşçısı Valeriy Marçenko «Suspilne Harkiv» içün izaatında eki memuriy bina ve çoq qatlı bina zarar körgenini ayttı. «Mında askerler yoq edi. Bu hızmetlerimiz çalışqan binalar: bergi, içtimaiy teminat, hazine. Vatandaş sakinler elâk oldı, körüne ki, pasport idaresiniñ yanında ediler», – dep qayd etti o.
«Bu zulumnı qabul etmek mümkün degil. Rusiyege basqı yapmaq, terrornı toqtatmaq ve canlarnı qorçalamaq içün mümkün olğanı qadar çoq küç qullanmaq kerekmiz – silâ quveti, sanktsiyalar quveti, diplomatiya quveti», – dep yazdı Ukrayina prezidenti Volodımır Zelenskıy.
İzüm 2022 senesi baarde Rusiye ordusı tarafından işğal etildi, amma şu seneniñ sentâbr ayında ukrayin askerleri onı azat ettiler. Şeerde ağır uruşlar oldı, olarnıñ neticesinde çoq qatlı binalarnıñ 80%-ğa yaqını yıqıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
