Rusiyeniñ nezaretinde olğan Aqmescitniñ Kiyev rayon mahkemesi Rusiyeniñ Ukrainağa arbiy tecavuzı vaqtında "Rusiye Silâlı quvetleriniñ qullanuvını itibardan tüşürmek" suçlaması ile eki Aqmescitlige para cezasını berdi. Bu martnıñ 16-nda Rusiye mahkemesiniñ saytında haber etildi.
"Aqmescit sakinleri Ukrainanıñ silâdan arıtıluvı ve denatsifikatsiyası çerçivesinde Rusiye Silâlı Quvetleriniñ (…) qullanıluvını itibardan tüşürmege yönetilgen açıq areketler ömürge keçirdiler, Rusiye Silâlı Quvetleriniñ qullanıluvını toqtatmağa açıq şekilde çağırdılar", - dep yazıla bildirmede.
Ekisine de aynı miqdarda cöremeler berildi – 50 biñ ruble.
Martnıñ 7-nde, Qırımda Rusiye polisiniñ hadimleri "Rusiye Silâlı quvetleriniñ itibardan tüşürilmesi" içün ilk memuriy protokollar tizgeni belli oldı.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
