Aqyarda mahkeme qararı daa qanuniy quvetini almağanı içün, Sea Mall Ticaret merkezi (TM) qapatıldı. Bunıñ aqqında yerli Kütleviy haber vastaları (KHV) haber ete.
ForPostnıñ malümatına köre, avgustnıñ 1-inde mahkeme Sea Mall TM-niñ sıñırlayıcı tedbirlerini toqtattı.
“Avgustnıñ 1-inde Aqyarnıñ Leninskiy rayon mahkemesinde mahkeme oturuşı keçirildi. Anda davanıñ teminatı boyunca tedbirler qısmen toqtatılğan edi, amma bu mahkeme qararı (ükümni itiraz etüvi olmasa) 15 kün devamında qanuniy quvetini ala, bunı mahkemeci ayrıca prokuratura ve cevapkârğa añlattı. Lâkin, mahkeme icracılarınıñ malümatına köre, Sea Mall vekilleri öz başına müürlerni qoparıp, TM-niñ binasını açtı (buñı yapmağa aqları yoq), böylece, mahkeme icracıları onı kene qapatmağa ketti”, - dep yaza “Primeçaniye” matbuatı.
ForPost adlı Mahkeme icracıları federal hızmetiniñ Aqyar idaresiniñ matbuat hızmeti bu malümatnı tasdıqladı.
Mahkeme icracılarnıñ malümatına köre, Sea Mall TC-niñ reberlerine, merkezni müddetinden evel öz başına açqanları icün, memuriy çöreme berilecek.
Resmiy saytlarda Sea Mall qapatılması aqqında malümat yoq.
İyülniñ 17-sinde Aqyarda Generala Ostrâkova soqagında Sea Mall TM qapatıldı.
Bir kün evelsi Aqmescitniñ Merkeziy rayon mahkemesi yanğın havfsızlığı qaideleri bozulğanı içün Merkeziy univermagnıñ (TSUM) işini toqtattı.
Mayısnıñ 24-ünde Kreml nezareti altındaki Aqyar şeer mahkemesi, aynı - yanğın havfsızlığı qaideleri bozulğanı içün, “Musson” TM-niñ işini toqtattı.
Qırım ve Aqyarda büyük sayıda adamlar toplanğan yerlerde itinanen yapılğan teşkerüvler martnıñ soñunda başlandı. Onıñ sebebi - Kemerovo rusiye şeerinde yüz bergen facia, anda yanğında, resmiy malümatqa köre, 64 adam elâk oldı.
Yanğın havfsızlığı qaideleri bozulması içün Aqmescitte “Kub” TM ve Gorkiy adına Qırım rus drama teatri qapatıldı. Yaltada mahkeme “Spartak” kinoteatri, “Dom torgovli” ve “Konfetti” TM-niñ işini vaqtınca toqtatmağa qarar berdi
