Ukrayina prezidentiniñ Qırım MC daimiy temsilcisi Tamila Taşeva student onıñ mektübi sabıq millet vekili, "Azatlıq" Bütün Ukrayina birleşmesiniñ azası İrina Farionnıñ telegram kanalında yayınlanğan soñ yaqalanmasına cevap berdi.
Taşeva, işğal altındaki bölgede bulunğan bir kişiden kelgen mektüpniñ yayınlanmasını "alçaqlıq ve cinayet" olaraq adlandırdı.
"Men er kün böyle vatandaşlarımıznen laf etişem... İnsannıñ ayatını telüke altına ataraq şahsiy yazışmamıznı açıq yerge yayınlamağa aqlıma bile kelmez edi. Ukrayina prezidentiniñ Qırım MC daimiy temsilcisi olaraq yuqarıda añılğan areketler içün Farionnıñ mesülietke çekilmesini talap etecegim", - dep yazıla bildirmede.
Söz "İrina Farion" telegram kanalında İrina Farionğa destek mektübi yayınlanğan yazı aqqındadır. Maksim Glebov adından kelgen mektüpte yollağan insan Keriçten olğanı ve Aqmescitte oquğanı yazıla.
Maksimniñ Farionnıñ yayınından soñ yaqalınıp yaqalanmağanını belgilemek imkânsızdır. Farion özü bu vaqianı izaatlamadı. Muarririyet onen bağlanmağa tırışa.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
