“Krımska svitlıtsâ” gazetası Ukrainada Creative Commons halqara litsenziyasını qullanıp başlağan matbuatlarnıñ birincilerinden oldı. Bunıñ aqqında “Milliy gazeta-mecmua neşriyatı” ukrain devlet teşkilâtınıñ baş müdiri Andrey Şçekun haber etti.
“2017 senesi aprel ayından başlap, “Krımska svitlıtsâ” gazetasınıñ basma versiyasınıñ ilk menbasında CC BY litsenziyası qayd etilgen. Böylece, “Krımska svitlıtsâ” Ukrainada Creative Commons halqara litsenziyasını qullanıp başlağan matbuatlarnıñ birincilerinden oldı. Wikitoplamğa (Wikimedia Commons) gazetanıñ bütün nushalarınıñ pdf-arhivi yüklenile ve muntazaman yañartıla”, - yazdı Şçekun.
Creative Commons - qullanuvı bedava olğan standart muqavelelerni (serbest ve serbest olmağan cemiyet litsenziyaları) işletip çıqarğan ticariy olmağan teşkilât. Olarnıñ yardımınen müellifler ve aq saibleriniñ öz fikirlerini ifade etmege ve öz eserlerini daa keñ ve serbest tarqatmağa imkânı bar, istimalcılar ise legal ve qolayca bu eserlerni qullanıp olur.
“Krımska svitlitsâ”nıñ ilk sanı 1992 senesi dekabr 31-inde Aqmescitte çıqtı. Qırımda gazeta 2014 senesine qadar neşir etildi. 2016 senesi gazeta muarririyeti Kıyivge keçirildi. Bundan soñ gazetanıñ neşiri devam etildi.
İyünniñ başında ilân etilgen “Krımska svitlitsâ” gazetaınıñ baş muarriri yerine konkursnıñ ğalibi Aqmescitten doğma Viktor Merjvinskiy oldı.
