AQŞ prezidenti Donald Trump, Ukraina barışığını muzakere etken "normand dörtü"niñ iştirakçileri kerekli körse, olarğa qoşulmağa azır olğanını ayttı, dep bildire "Ğolos Amerıkı".
"Men bellesem, Ukraina ve Rusiye esirlerinen almaşqanı – pek büyük adım, ve pek müsbet adımdır. Men qoşulğanım olarğa kerek olsa edi, men qoşulır edim", - dedi Donald Tramp.
Ukraina prezidenti Volodımır Zelenskıy, Donald Trampnıñ bu laflarını daa tefsir etmedi.
Sentâbrniñ 8-inde Frenkistan ve Rusiye prezidentleri, "bir qaç aftadan" normand formatında ihtimallı körüşüv olacağını ilân etti.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Ukraina Yuqarı Radasınıñ insan aqları vekâletlisi Lüdmila Denisovanıñ malümatına köre, Rusiye öz toprağında ve ilhaq etilgen Qırımda daa 110 Ukraina vatandaşını tuta.
