Rusiye ordusınıñ Ukraina ile sıñırlarda toplanması - NATO baş kâtibiniñ Avropa Birligi memleketleriniñ mudafaa nazirleri ile bugünki körüşmesiniñ esas mevzularındandır. Bunı jurnalistlergen Yens Stoltenberg noyabrniñ 16-nda aytışmalr başlamazdan evel bildirdi, dep haber ete Azatlıq Radiosı.
"Biz Ukraina reberligi ile sıqı bağdamız. Yaqınlarda prezident Zelenskıy ile laf ettim, tış işler naziri Dmıtro Kuleba ile korüştim. Ukraina ile sıqı işbirlik etmege ve oña siyasiy ve ameliy yardım köstermege devam etemiz", - dedi Stoltenberg.
Baş kâtip, İttifaq Ukrainanı "yalıñız sözlerinen degil", em de amellerinen desteklegenini bildirgen pek açıq-aydın signal yollağanını qoştı.
"İttifaqdaşlar Suvuq cenkten berli kollektiv mudafaanıñ eñ büyük küçlendirilmesini tatbiq ettiler. Biz şarqtaki ortaq memleketlerde, Qara deñiz bölgesinde arbiy bulunuvımıznı arttırdıq, quvetlerimizniñ cenkke azırlığını arttırdıq. Ve bu, NATO ittifaqdaşlarınıñ öz ortaqlarını qorumaq azır olğanına delâlet etken Rusiye içün pek açıq-aydın signaldır", - dedi Stoltenberg.
Ukraina prezidenti Volodımır Zelenskıy Ukraian ile sıñırda aman-aman 100 biñ Rusiye askeri bulunğanını bildirdi.
