Köktöbelde bir plâjnı çirkef suvu bastı. Bu aqta Kafa News Kefe (Feodosiya) haber saytı bildirmekte.
Matbuat vaqianıñ videosını da derc ete.
Kefeniñ rusiyeli memuriyetiniñ matbuat hızmeti bildirgeni kibi, iyülniñ 3-ünde, taşlantılar sebebinden raatsız olğan yerli sakinler, şeer akimiyetine muracaat etti.
"Teşkerüv vaqtında, tehnikiy zona sayılğan yerge çirkef borularından evel toplanğan yağmur suvu aqıp başlağanı, bilindi. Yaqında qasabada yağğan yağmurlardan soñ sel peyda oldı, o, çirkef borularından toplanğan çöplükni basıp çıqardı, dep tüşünemiz", - denile beyanatta.
Memuriyetniñ malümatına köre, Rosprirodnadzor ve Rospotrebnadzor, suvnı teşkerecek.
