Ukraina Mudafaa ve Milliy Havfsızlıq Şurasında (MMHŞ), yasaqlanğan Rusiye içtimaiy ağları ve saytlarına qarşı sanktsiyalar lâğu etilmedi, dep bildireler. "Sanktsiyalarnıñ lâğu etilmesi aqqında beyanat sayısı çoqlaşqanından soñ", MMHŞ böyle bildirüvni öz saytında derc etti, dep bildire Azatlıq Radiosı.
"Sanktsiyalar aqqında" Ukraina qanunına köre, sanktsiyalarnıñ qullanuvı, lâğu etilmesi ya da deñiştirilmesi aqqında qararlarnı, sırf Ukraina Yuqarı Radası, Ukraina prezidenti, Ukraina Nazirler Kabineti, Ukraina Havfsızlıq Hızmeti ve Ukraina Milliy Bankı teklifleri esasında Ukraina Mudafaa ve Milliy Havfsızlıq Şurası tarafından qabul oluna. MMHŞ qararına köre Prezident fermanı ile kirsetilgen sanktsiyalarnıñ kerçekleştirilmesini ve közetüvini, Ukraina Milliy Bankı ve Ukraina Havfsızlıq Hızmetinen beraberlikte, Ukraina Nazirler Kabineti becere", - dep htırlattılar MMHŞde.
2017 senesi baarden berli, Ukrainada "Yandex" servisi, Mail.ru gruppasınıñ saytları, "VKontakte" ve "Odnoklassniki" rusiye içtimaiy ağları yasaqlanğan. MMHŞ, olar Ukraina "milliy havfsızlığına telüke ola bile", dep sayalar.
