Ukrayına Mudafaa nazirliginiñ Baş idaresi bu küzni cenkniñ müim vaqtı dep saya, dep bildirdi.
«Küz müim bir devir olacaq. Tabiat ve iklim şaraitleri aqqında aytsaq – sentâbr-oktâbr olacaq. Soñra ava yaramay olacaq, noyabr, qış, amma cenk areketleri devam etecek. O qadar faal olmaycaq, belki, amma Rusiye Federatsiyasınıñ silâlı quvetleri bıltır qışta Sumı ve Çerniğiv vilâyetlerimizge qarşı küç qullanğan edi. Anda qaçqanlarına baqmadan, Rusiyede sıñırlarımız yaqınlarında tahminen 4 batalyon taktik gruppası qala. Ola, birinciden, toprağımızğa ateş aça. Ekinciden, kerginlikte tuta ve küç ve vastalarnıñ diqqatını celp ete», – dep bildirdi Ukrayına istihbarat idaresiniñ vekili Vadım Skibitskıy RBK-Ukrayına neşirine bergen intervyüsında.
Onıñ aytqanına köre, «ne de olsa», qış qıyın olacaq, «çünki Ukrayına Silâlı quvetlerini kerginlikte tutmaq içün cenk areketleri olacaq».
«Ekincisi – Rusiye vaziyetimizni kerginleştirmek içün kesen-kes qullanacaq energetik resurslar. Böyle etip baarge, küçlü cenk areketlerine azırlanacaqlar», – dedi Skibitskıy.
O, Ukrayına quvetleri planlaştırğan areketlerniñ «muvafaqiyeti olacaq», dep ümüt etti.
«Rusiye Federatsiyasınıñ işğal, Donetsk regionı planlarını bozacaqmız. Elimizdeki imkânlar yeterli olmasa da, yardım kele, cenk areketlerini planlaştıramız. Olarnıñ idare noqtalarına, silâ anbarlarına, arbiylerine ücüm etemiz», – dedi o.
Skibitskıynıñ aytqanına köre, bugünki künde fevral ayından berli cenk areketlerinde iştirak etken Rusiye Federatsiyasınıñ bazı bölük teminlevi 30% ola.
«Bu kereginden azdır. Olarnı toldurmaq kerek, amma statistik malümatta körgenimiz kibi, Moskva qurğan añlaşma esasında, göñülli aluv planlarınıñ 50%-ı yerine ketirile. Ve umumiy seferberlik de öyle: belki, vaqıt kelir, Rusiyeniñ maqsadlarına irişmek içün – Ukrayınanıñ bütünley işğali – umumiy seferberlikni ilân etmege mecbur olacaqlar», – dedi Ukrayına istihbaratınıñ temsilcisi.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
