Aqmescitte Rusiye uquq qoruyıcalır Gagarin parkında ukrayınca şiarlar seslendirgen ve ukrayın yırlarını aytqan beş gençni tuttı. Bu aqta Qırımdaki İç işler nazirliginiñ idaresi haber ete.
«17 yaşından 21 yaşına qadar beş vatandaş tutuldı, idariy uquq bozuvları bar, hususan Rusiye Federatsiyasınıñ silâlı quvetlerini itibardan tüşürgen qanunsız areketlerini yapqanından şübheleneler», – dep aytıla haberde.
Gençlerge qarşı Rusiye ordusını «itibardan tüşürüvge» istinaden idariy protokollar tizildi.
Sorğu videolarında tutulğan gençler Ukrayına milletçileriniñ şiarlarını seslendirdi ve ukrayın yırlarını yırladı, dep tarif ete. Tutulğanlarnıñ ad ve soyadları aytılmay.
Qırım ve Aqyarda Rusiyeniñ Ukrayınağa qarşı istilâsına qarşı çıqqanların taqip etmege devam eteler. Kütleviy haber vastalarınıñ soñki malümatına köre, fevralniñ 24-nden başlap 107-den çoq qırımlı Rusiye ordusını «itibardan tüşürüv» idariy davalarınıñ mabüsleri oldı, 11 Qırım ve Aqyar sakini «cenkke qarşı davalarğa» istinaden apiske alına bile.
Bundan ğayrı, Aqyarnıñ Rusiye akimiyeti Ukrayına akimiyetine qoltutqanlarnı çaqacaq chat botunı açtı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
