Aqyarda eki küçlü patlav oldı, yerli saifeler Rusiyeniñ ava mudafaa sistemasınıñ işi aqqında bildire.
«ÇP Sevastopol» telegram kanalı beyaz tuman körüngen foto ve videolarnı derc etti.
Aqyarnıñ Rusiye akimiyeti ve Rusiye Mudafaa nazirligi bu vaziyetni izaatlamadılar. Ukrayına resmiy şahısları da adiseni şimdilik izaatlamay.
Avgustnıñ 22-nde aqşam Aqyarda patlav oldı, dep bildirdi yerli Telegram kanalları ve «VKontakte» içtimaiy ağınıñ saifeleri.
Daa evel berilgen malümatqa köre, Aqyarda sığınaqlar teşkerilip başladı.
Soñki künleri Qırım ve Aqyarda patlavlar oldı. Rusiye akimiyeti tüşürilgen uçucısız cihazlar ve ava mudafaasınıñ işi aqqında bildirdi, amma bir delil köstermedi. İçtimaiy ağlarnıñ qullanıcıları, ilk malümatqa köre, Rusiye ava mudafaasınıñ işi olğan videonı derc etti.
Avgustnıñ 16-nda saba işğal etilgen Qırımnıñ Canköy rayonında patlavlar oldı. Silâ anbarları, transformator alt stantsiyasında patlavlar ve demir yolnıñ zarar körgeni aqqında haber etildi. Rusiye akimiyeti Canköy rayonınıñ Qalay köyünden 3 biñden çoq sakin tahliye etildi, dep bildirdi.
Rusiye Mudafaa nazirligi Qırımnıñ şimalinde olğanlarnı «diversiya» dep adlandırdı. Qırımda cinaiy iş açıldı. Şübheli ya da tutulğanlar aqqında malümat berilmey.
Qırımnıñ Rusiye yolbaşçısınıñ mesleatçısı Oleg Krüçkov Qırımdaki patlavlarnı «terakt» dep adlandırdı.
The New York Times neşri yüksek rutbeli Ukrayına memurına atfı etip, işğal etilgen Qırımnıñ Canköy civarındaki patlavlarğa «elit ukrayin bölüginiñ» alâqası bar, dep bildirdi. Neşirniñ qayd etkenine köre, memur adı gizli olğanını istegen.
Avgustnıñ 9-nda Saq rayonınıñ Novofedirivka qasabasınıñ arbiy uçaq alanında patlavlar oldı. Rusiye akimiyeti «yaqın evlerden» tahminen 30 kişi tahliye etildi, dep bildirdi. 60-tan çoq mesken ev zarar kördi.
Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.
Ukrayına akimiyeti ve arbiyleri Rusiye işğal etken Qırımdaki patlavlardan mesüliyetini tanımadı.
