Aqyar kirişinde qoşma blokpostlar qoyula bile, naqliyat teşkerilüvi quvetleştirilecek, dep bildirdi şeerniñ Rusiye yolbaşçısı Mihail Razvojayev.
«Bir komendant vaqtı, şeerge kiriş ve çıqış qaideleri kirsetilmeycek, areket bir şekilde sıñırlanmaycaq. Amma kiriş statsionar, gece-kündüz çalışqan yol areketi telükesizliginiñ ve Rusiye gvardiyasınıñ noqtaları çalışa, olar hususan yük maşinalarını ve bazı şahsiy maşinalarnı teşkere. Bu iş devam etecek, quvetleştirilecek, qoşma noqtalar peyda ola bile. Büyük sıñırlavlar şimdilik planlaştırılmay», – dep bildirdi Razvojayev Telegram kanalındaki video izaatında.
Oktâbrniñ 19-nda Rusiye prezidenti Vladimir Putin Rusiye arbiyleri işğal etken Donetsk, Lugansk, Zaporijjâ ve Herson vilâyetlerinde cenk vaziyeti kirsetilgenine dair buyruqnı imzaladı, dep bildirdi.
Putinniñ fermanına köre, işğal eetilgen Qırım ve Aqyarda «orta seviyeli tedbir» kirsetildi. Bir sıra sıñırlavlar beklenile. Qırımnıñ Rusiye yolbaşçısı Sergey Aksenov Qırımda komendant saatı ve Qırımğa kiriş sıñırlavları şimdilik planlaştırılmay, dep bildirdi.
Oktâbrniñ 8-nde saba Qırım köpründe patlav oldı. Rusiye tahqiqatçılarınıñ versiyasına köre, yük maşinası patladı. Neticede eki maşina yolu zarar kördi, patlav sebebinden ya da aynı vaqıtta köpürniñ tren yolundan ketken yük treni yanıp başladı.
Rusiye prezidenti Vladimir Putin bu patlavnı "terakt" dep adlandırdı, onıñ icracıları ve sımarış etkenler Ukrayina mahsus hızmetleri ola. Rusiye Tahqiqat komiteti Rusiye Ceza kodeksiniñ 205-inci maddesine («Terrorizm») istinaden cinaiy dava açtı.
Ukrayına Baş istihbarat idaresiniñ spikeri Andrey Yusov Rusiyeniñ Keriç köpründe patlav tahqiqatını «saçmalıq» dep adlandırdı.
Ukrayına resmiy şahısları izaat bermey. Prezident ofisiniñ yolbaşçısı Mıhaylo Podolâk «Putinniñ şahsiy leyhasını» patlatuv – rusiyelilerniñ işi ve arbiy reberlikniñ FSBge qarşı ücümi ola, dep ayttı.
Bulğaristan ve Gürcistan Keriç köpründe patlatılğan yük olarnıñ sıñırlarından keçti degen Rusiye tahqiqatınıñ malümatını red etti. Ermenistan «Keriç köpründe terakt kerçekleştirüvde aracılıq» aqqında cinaiy dava açtı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
