Sentâbrniñ 17-nde aqşam ve sentâbrniñ 18-nde gece Aqyarda ve Qırımnıñ Or Qapı rayonınıñ mesken yerlerinde patlar ve atışlar eşitildi.
Rusiye kontrolindeki Aqyar yolbaşçısı Mihail Razvojayev sentâbrniñ 18-nde saba dron ücümi aqqında bildirdi, onıñ aytqanına köre, Rusiye arbiyleri bir künde beş dronnı urdı. Aytqanlarınıñ delilini köstermedi.
“Krımskiy veter” Telegram kanalı yerli sakinlerniñ aytqanlarına esaslanıp bildirgenine köre, Aqyarda Maksimov yaz evi ve Kazak körfezi civarında bir qaç patlav oldı. Bundan ğayrı, Or Qapı rayonında dronlar uçtı ve atış oldı.
Ukrayina arbiyleri bu ücümlerni şimdilik izaatlamadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.