Aqyarda yañı koronavirus hastası - 9-ıncı şeer hastahanesiniñ patsiyenti - qayd etildi. Şeer akimiyeti bildirgeni kibi, şimdilik qadın infektsiya hastahanesinde yata.
"İnfektsiya hastahanesiniñ statsionarında COVID-19 hastalığı tasdıqlanğa 30 adam yata. Yılnıñ başından berli Aqyarda 37 COVID-19 adisesi qayd etildi, yedi adam yahşı olıp hastahaneden çıqtı", - denile beyanatta.
Bugünde-bugün Aqyarnıñ infektsiya hastahanesinde 140 adam, mesken yerlerinde 1096 adam nezaret altında buluna.
Saba belli oldı ki, Qırımda daa doquz adam koronavirusnen hastalandı.
Böylece, şimdilik Qırımda 79 koronavirus adisesi tasdıqlandı. Olardan 20-si çetelden ketirildi, 10-u Rusiyeden ketirildi, 49 adise - yerli adiselerdir. Aqyarda umumen 36 COVID-19 hastası bar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
