Link açıqlığı

Saatnıñ esas haberi

Sentsov, Kreml mabüslerine destek köstermek içün, yazıcılar marafonında iştirak etti


Oleğ Sentsov Lvivde
Oleğ Sentsov Lvivde

Lvivde İvan Franko eykeli yanında sentâbr 22-sinde "Apishaneden mektüpler" yazıcılarnıñ Kreml mebüslerine destek marafonı keçti. Onda sabıq siyasiy mabüs Oleğ Sentsov, uquq qoruyıcı, dissident Mıroslav Marinovıç, yazıcı Andriy Kurkov, aktrisa Rımma Zübina, Qırım eviniñ programma müdiri Alim Aliyev iştirak etti. Olar, apishanede tutulğanlarnıñ ve olarnıñ tuvğanlarınıñ mektüplerini oqıp berdi. Bunı Radio Svoboda bildirmekte.

"Meni ve bütün Ukraina siyasiy mabüslerine destek kösterge lvivlilerge, ukrainlerge ve başqa memleketlerniñ sakinlerine minnetdarım. Şimdi işim çoq. Amma esası - Qırım, Rusiye ve Donbass apishanelerinde alâ daa tutulğan esirlerimiz içün küreştir. Biz adam bir şey yapıp olamaz, amma beraberlikte bayağı iş becerirmiz. Yigitlerimizni evlerine qaytaracağımızğa pek ümüt etem. Ukrainağa şan-şüretler!", - dedi Sentsov yazıcılar marafonınıñ açılışında.

Uquq qoruyıcı, dissident Mıroslav Marinovıç, doğru eki yıl evel, sentâbrniñ 22-sinde Qırımda maküm etilgen ve şimdi ev tevqifinde bulunğan Qırım.Aqiqat müellifi Mıkola Semenanıñ mektübini oqudı. Yazıcılar marafonınıñ iştirakçileri, faaller Remzi Bekirov, Server Mustafayev, Ruslan Süleymanov, Stanislav Aseyevniñ mektüplerini de oqudı.

Eki yıldan berli Lvivde "Neşirciler forumı" vaqtında Kreml mebüslerine destek aktsiyasını keçireler. Marafonğa PEN Ukraine teşkilâtı qoşula, onıñ eki azası - Stanislav Aseyev ve Mıkola Semena da Kreml mabüsleridir.

Grajdan azatlıqları merkeziniñ malümatına köre, Rusiyede ve ilhaq etilgen Qırımda eñ azından 86 adam apishanelerde tutula. Ukraina Havfsızlıq Hızmetine köre, boyevikler Donbassta 227 ukrainni esirlikte tuta.

XS
SM
MD
LG