Rusiye prezidenti Vladimir Putinge, rejissör Oleg Sentsovnıñ rusiye koloniyasından azat etilmesi talabınen, içtimaiy ve siyasiy basqını “keç olmağance” yapmaq kerek.
Bu aqta çehiyalı publitsist ve dissedenti Petra Şustrova, avgustnıñ 6-nda “Svetozor” praga kinoteatrinde rusiye rejissörı Askold Kurovnıñ “Protsess” filminiñ kösterüvinden soñ ayttı.
Petra Şustovanıñ: - “Bu vaqia aqqında aytılacaq dost, tanışı, qorantalarımız bar, şahsen ya da içtimaiy ağlar vastasınen, saylavcılar öz vekiline muracaat ete bile. Biz olarnen çalışmaq kerekmiz, olarnı bezdirmek ve kerekli sayğanımıznı talap etmek kerekmiz. Şimdi ise kereklisi – yapmağanı ve atta yapmağa azırlanmağanı içün apiske oturtılğan adamnıñ tarafını almaq. Bu adaletsiz ve esası – susıp oturmamaq!”, - dep aytqanını Azatlıq Radiosı nıñ muhbiri haber ete .
Muzakerede insan aqları boyunca Çehiyanıñ sabıq naziri Camili Steglikova ve Pirat partiyasınıñ parlament mebusı Yak Lipavskiy de iştirak ettiler.
Haber etilgenine köre, film kösterüviniñ teşebbüsçisileri - Vesiqalı film İnsitutınıñ hadimleri Tereza Şimikova ve Valter Nad oldı.
Askold Kurovnıñ “Protsess” filmi endi Çehiyanıñ bir qaç halqara kinofestivalinde numayış etildi. Sentsovnıñ işi ise iyül ayında olıp keçken Karlovı Varı festivalinde faş olundı. Çeh televizionı bu filmni endi eki kere efirinde yayınladı.
Çehiyanıñ vesiqalı film İnsitutı, filmniñ muntazam kösterüvlerini tek paytahtta degil de, Çehiyanıñ başqa şeerlerinde de keçire.
Sentsov işine bağışlanğan “Protsess” filmini Askold Kurov çıqardı. Bu film keçken yılnıñ dekabrinde “Artdokfest” Moskova festivalini açtı. Ukrainada 2017 senesi aprel 6-nda kösterilip başlandı.
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen muddetsiz açlıq ilan etken edi.
Ukrainalı rejissör Oleg Sentsov Rusiye apishanelerinde yatqan bütün ukrainalı siyasiy mabüslerniñ azat etilmesi talabınen muddetsiz açlığını devam ete. O, mayısnıñ 31-nde «onı deñiştirüv meraqlandırmağanı», çünki o «soñuna qadar baracaq insan olğanını» ilân etken edi.
İyün 14-te Avropa parlamenti Rusiyeden, qanunsız yaqalanğan, tevqif ve apis etilgen bütün Ukraina siyasiy esirlerini deral azat etmege çağırdı.
Ukraina ve bütün dünyada faalcileri Rusiye ve presidenti Vladimir Putinden qanunsız yaqalanğan ukrain mabüslerini azat etmege talap ete. Aktsiyalar #FreeOlegSentsov ve #SaveOlegSentsov şiarlarınen çeşit-türlü memleket ve ülkelerde keçe.
