Saq rayonınıñ Frunze adına quşçulıq zavodı yaqın vaqıtta işini toqtata bile. Qırım.Aqiqat mühbiri haber etkenine köre, 300 işçiniñ aylığı eki ayğa yaqın berilmey turdı.
Oktâbr 8-inde olar, reberler vaziyetni añlatsın talabınen memuriyet binasınıñ yanına keldi.Keçken ay müessisede işçilerniñ kütleviy qısqartuvı keçti.
“Bizim hocalığımızğa endi 89 yıl! O ilerley edi, amma, apansızdan, 2014 senesinden başlap biz kimsege kerekmey olıp qaldıq. Topraq ve boğdaynı tutıp aldılar, ayvanlarnı aşatmağa şey yoq, tavuqlar ölüp kete! Er şeyni tutıp aldılar. Şimdi iç bir şey kâr ketirmey! Ebet, kâr ketirmeycek, çünki er şey aç öle. Er şey yoq etile. Aselet yoq etile”, - dey çiftlikniñ işçisi Yekaterina Bondarenko.
İşçiler haber etkeni kibi, üç ay evelsi olar, tuvar ve tavuqlarnıñ yemi yetmemezligine oğradı. Mal-süt fermasınıñ başı Galina Romançenko añlatqanına köre, bu, bu yılnıñ qurğaq mevsiminen ve para berilmegeninen bağlı.
Aynı bu sebepten, işçilerniñ aytqanına köre, quşçulıq fabrikası mal-mülküniñ bir qısmı endi satıldı.
“Bir afta devamında tavuqlar iç bir şey aşamağan. Yımırta ucuzlandı. Bugün menim kümesimde yımırta olmadı, amma kümesimniñ 14,5 biñ tavuğı bar. İşte, sayıñız - 0%. Evelde semerelilik 96-97% edi. Şimdi ise - sıfır!”, - dep aytıp berdi dep aytıp berdi fabrika hadimi Viktor Konnov.
İşçiler bir saattan çoq memüriyet binasınıñ yanında turdı, amma olarğa reberlerden iç kimse çıqmadı. Memuriyette bunı, başlıqlar Aqmescitte müşaverede buluna dep añlattılar.
Qırım.Aqıqat hadimine, vaziyet tefsirini telefon bağı ile bermege de red ettiler. Müessiseniñ qapatılması aqqında resmiy haber olmadı.
2015 senesi sentabr ayında Rusiye Maliyeviy nezaret hızmeti, Frunze adına quşçulıq zavodında 20 million rublelik maliyeviy qanun bozuluvını meydanğa çıqardı. Quşçılıq fabrikasınıñ müdirinen bozuluvlarnı yoq etmek buyruğı berildi
