Rusiye tarafından mahküm etilgen qırımtatar faali Seyran Saliyev iyül ayından berli Rusiyeniñ Tula vilâyetindeki 4-nci SİZO-sında sert şaraitlerde tutula. Bu aqta "Qırım birdemligi"ne apishanede bulunğan aqayını ziyaret etken qadını Mümine Saliyeva bildirdi.
Qorantağa körüşmege izin bermey ediler, şunıñ içün qadın mahkemege muracaat etti. İyül ayında yaqınları ile körüşüvni lâğu ettiler, çünki onı SUS-qa yerleştirdiler. 2022 senesiniñ oktâbrinden 2024 senesiniñ fevraline qadar 22 kere para cezasını alğanı sebep oldı. Mahkemege kelgen dava malümatında cezahane Saliyevni "qorqunçlı bozuvcı" olaraq adlandıra.
"O, külümsereyerek, böyle bir şey olmağanını ayttı, atta sözlü şekilde aytılmağanı. Ceza izolâtorına qabaatlav subetleri, tenbiyelevlersiz yerleştire ediler, ve bu da qanunsızdır", — dep qoştı qırımlınıñ qadını.
SUS-qa kirsetilgende Saliyevniñ Quran tercimesi alındı.
Noyabrde keçirilgen körüşüvni koloniya memuriyeti tasdıqladı.
Saliyevniñ blokunda 35 mabüs bar. Koloniya içindeki rejim sebebinden oña daa az körüşüv ve yollamalar berile, sıq-sıq çıqıp olamay. Qırımlını künde bir kere bir buçuq saatqa soqaqqa çıqaralar, amma "açıq ava altında degil", dep qayd ete onıñ qadını.
Mümine Saliyeva dey ki, apishanede qırımtatarnıñ tişleri fenalaştı ve körüvi fenalaştı, küneş yarığı olmağanı içün terisi "şeffaf" oldı.
"Başı bütünley beyaz, bütünley beyaz. Ve onıñ içinde olğan qasevetni añlayım", — dep ayttı Saliyeva.
Saliyev Rusiye quvetçileri tarafından 2017 senesi oktâbr ayında tutuldı. Onı Rusiyede yasaq etilgen "Hizb ut-Tahrir" teşkilâtınıñ faaliyetinde qabaatladılar. 2020 senesi Rusiye mahkemesi Saliyevni 16 yılğa üküm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
