Aqyarda rusiye mahkemesi tarafından mahküm etilgen “ukrain diversantları davası”nıñ iştirakçisi Dmitriy Ştıblikov Omsk şeeriniñ 6-ncı koloniyasından bilinmegen yerge yollanıldı. Bu aqta Facebook ağında Azatlıq Radiosınıñ rus hızmetiniñ jurnalisti Anton Naumlük haber etti.
Onıñ malümatına köre, izolâtsiya şartlarında bulunğan Ştıblikovnı, Omsk koloniyasında oktâbr 6-sında olğan çatışmalardan soñ, etap ile alıp kettiler. Aynı vaqıtta, Naumlük, Ştıblikov çarpışuvda iştirak etmegenini iddia ete.
Ondan belli olğanı kibi, oktâbr 6-sında Omsk koloniyasında mabüslerniñ arasında işkence ve sopalavlar sebebinden çatışma yüz berdi, pencereden “Qurtarıñız” yazısı asılıp qoyuldı. Küç organlarınıñ ve Rosgvardiyanıñ hadimleri kirsetildi. 200-ge qadar adam iştirak etken isyandan soñ, olarnıñ bir qısmı açlıqnı ilân etti. Neticede 40-qa yaqın adam zararlandı, eñ azı birisi reanimatsiyağa oğrağan.
2016 senesi noyabrniñ 9-da Aqyarda «Ukraina Mudafaa nazirligi baş istihbarat idaresiniñ diversion-terroristik gruppasınıñ azaları» Dmitriy Ştıblikov, Aleksey Bessarabov ve Vladimir Dudka yaqalanğan ediler.
2017 senesi noyabrniñ 16-sında Aqyar şeer mahkemesi Ştıblikovnı 5 yıllıq şiddetli rejim koloniyasına ve 200 biñ rublelik (95 biñ grivna) para cezasına mahküm etti.
İşğal etilgen Aqyarda yaqalanğan Dmitriy Ştıblikov ve Aleksey Bessarabov 2014 senesine qadar «Nomos» merkezinde arbiy ekspertler olaraq çalışa ediler.
Ukraina havfsızlıq hızmeti Qırımda tutulğan Ukraina vatandaşları SBU ne hadimleri, ne habercileri olmağanını bildirdi.
2017 senesi Ştıblikov öz qabaatını tanıp, tahqiqatnen mahkemeden evel añlaşma tizdi. Mustaqil avdokatlardan iç birisini oña yibermediler.
Keççe Kreml nezareti altındaki Aqyar şeer mahkemesi Ştıblikovnı beş yıllıq apis cezasına üküm çıqardı. Onı Rusiyedeki Omsk şeeriniñ 6-ncı koloniyasına etap ile alıp kettiler.
