Rusiyeniñ insan aqları vekâletlisi Tatyana Moskaltsova, açlıq tutqan ukrain rejissörı Oleg Sentsovnıñ alı “stabil”, onıñ “tedaviylev programmasını doğurttılar” dep iddia ete. Bunı Moskaltsova oktâbr 4-yünde, Sentsovnıñ baqıluv neticelerini tefsir eterek aytıp berdi.
“Sentsovnıñ alı aqqında aytqanda - o daima Yamalo-Nenetsk bölgesi koloniyasınıñ apis ekimleri ve sade ekimlerniñ nezareti astında bulunmaqta. Soñki baqıluv bir qaç kün evel yapıldı, tedaviylev programması biraz doğurtılğan edi”, - Moskaltsovanıñ sözlerinden yaza “İnterfaks”.
Rusiye ombudsmeniniñ malümatına köre, “Sentsov ğıdalı qarışmalarnı damar içine ve toz sıfatında başqa ğıdalı qarışmalarnı da ala”.
“Ekimler, onıñ alı stabil dep sayalar. Men bu malümatnı Yamalo-Nenetsk muhtar bölgesindeki vekâletlimizden, koloniya başlığından er kün alam”, - dep qayd etti o.
Rusiye advokatı Dmitriy Dinze Ukraina rejissöri Oleg Sentsovnı koloniyada cuma künü, oktâbrniñ 5-nde, ziyaret etecek ola.
Sentâbrniñ 28-nde Sentsov «planlaştırılğan teşkerüv içün» şeer hastahanesine çıqarılğan edi. Neticede Rusiye ekimleri «tedaviylevini tüzetti», dep bildirdi Rusiyeniñ cezalarnı yerine ketirüv federal hızmeti.
Sentâbrniñ 11-nde Sentsovnıñ eki doğmuş qardaşı Natalya Kaplan rejissörniñ alı ket-kete fenalaşa, dep Qırım.Aqiqatqa bildirgen edi. Onıñ aytqanına köre, Sentsovnıñ qan sisteması «müim müçelerge oksigen taşımasını yapamay».
Sentsovnıñ advokatı Dmitriy Dinzeniñ bildirgenine köre, açlıq tutqan rejissör töşekten zornen tura. Onıñ aytqanına köre, ukrainalınıñ sağlığına «büyük zarar ketirildi».
Siyasiy mabüs Oleg Sentsov aqqında daa çoq malümat Qırım.Aqiqat saytında tapa bilesiñiz.
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen müddetsiz açlıq ilan etken edi.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
