Avropa Birliginiñ diplomatiya yolbaşçısı Kaya Kallas Rusiyeniñ Ukrayinağa qarşı daa bir büyük ücümini takbih etip, Rusiye lideri Vladimir Putin barışıq olmasını istemey, dep bildirdi.
"Putin barışıq olmasını istemey, Rusiyeniñ diplomatiyağa cevabı – daa çoq raketa ve yıquv. Ukrayinağa yardım etmesek, tekrarlanğan Rusiye darbeleriniñ sheması çalışmağa devam etecek. Rusiyeniñ "Oreşnik" raketasını qullanuvı Ukrayinağa qarşı kerginleşüv ve Avropa ve ABD içün tenbi ola", – dep yazdı Kallas yanvarniñ 9-nda X içtimaiy ağında.
Onıñ qayd etkenine köre, AB memleketleri "ava mudafaası yedeklerine terence baqmalı" ve Ukrayina ögündeki vazifelerini acele yerine ketirmeli. "Moskva içün bu cenkniñ fiyatını daa ziyade arttırmaq kerekmiz ki, hususan sanktsiyalarnı quvetleştirip", – dep qoştı Kallas.
Ukrayina Silâlı quvetleriniñ Ava küçleri haber etkenine köre, esas nişanı Kyiv vilâyeti olğan darbe içün Rusiye arbiyleri 36 raketa ve 242 (tahminen 150-si – "şahedler") uçucısıznı qullandı. Ukrayina Silâlı quvetleri Rusiye quvetleri tarafından Astrahan vilâyetiniñ Kapustin Yar poligonından orta mesafeli ballistik raketa qullanılğanını tasdıqladı. Arbiylerniñ malümatına köre, ava mudafaası 244 nişannı tesirsiz alğa ketirdi, 18 raketa ve 16 darbe uçucısızı 19 yerge ücüm etti.
Rusiye Mudafaa nazirligi saba Lviv vilâyetine qarşı darbe içün "Oreşnik" orta mesafeli ballistik raketasını qullanğanını tanıp, bunı Ukrayinanıñ Rusiye lideri Vladimir Putinniñ Novgorod vilâyetindeki rezidentsiyasına qarşı ücüminiñ cevabı dep adlandırdı. Ukrayina ve ğarbiy ortaqları böyle bir darbe endirilgenini inkâr etip, Rusiye bu şekilde yañı ücümlerni aqlamağa ve barışıq muzakerelerini sozmağa tırışa, dep bildire.
Ukrayina Tış işler naziri Andriy Sıbiğa darbege cevap olaraq Ukrayina BM Telükesizlik Şurasınıñ acele toplaşuvını, Ukrayina-NATO Şurası toplaşuvını, AB, Avropa Şurası ve OSCE çerçivesinde cevap berilmesiniñ teşebbüsçisi oldı.
"AB ve NATO sıñırları yaqınlarında böyle bir darbe Avropa qıtasında ciddiy telükesizlik havfı ve transatlantik toplulıq içün sınav ola. Biz Rusiyeniñ aqılsız areketlerine acele cevap berilmesini talap etemiz. Amerika Birleşken Devletlerine, Avropa ortaqlarımıznı ve bütün memleket ve halqara teşkilâtlarnı bu telükeli darbeniñ tafsilâtlarını diplomatik kanallardan haberdar etemiz", – dep yazdı Sıbiğa X içtimaiy ağında.
Kyivde darbe neticesinde dört insan elâk oldı, 25 kişi yaralandı, aralarında ekimler ve qurtarıcılar bar. Şeerde suv ve qızdıruv problemleri bar. Kyiv vilâyetinde akimiyet yıquvlar ve 5 yaralanğan kişi aqqında haber etildi.
