Rusiyede 2022 senesi oktâbr ortasına qadar eñ az 492 biñ kişi seferber etilmesi mümkün edi, dep saydı «Mediazona» Rusiye neşiri, Rosstat ve ealini cedvelge aluv malümatlarınen qıyaslap.
«Mediazona» seferberlik ilân etilgen soñ toylarnıñ sayısı artqanına dair malümatqa (celpname alğanlar muracaat künü evlenmege imkân bere) esaslanıp, cenkke alınğan Rusiye erkekleriniñ sayısını saydı.
Jurnalistlerniñ elinde olğan malümatqa köre, umumen 75 regionda 31 biñ çift «tez-tez» evlendi. Toylarnıñ sayısı belli olğan er bir regionda neşir seferberlikniñ sayısını bildi – 18 yaşından 49 yaşına qadar erkeklerniñ sayısı aqqında malümatnen qıyasladı. Esaplarğa köre, oktâbrniñ ortasına qadar bu regionlarda eñ az 431 biñ kişi seferber etildi. Malümatı olmağan regionlarda seferber etilgenlerniñ sayısını bilmek içün jurnalistler seferberlikniñ orta fayızını 1,56% olaraq qıymet kesti. Bu alda, olarnıñ esaplarına köre, Rusiyede oktâbrniñ ortasına qadar 492 biñ insan seferber etilmesi mümkün edi.
Eñ çoq seferber etilgen kişi memleketniñ şarqında qayd etildi, eñ az kişi Moskvada seferber etildi.
Putinniñ buyruğını incelegen aq qorçalayıcı ve uquqçılar vesiqa sıñırsız sayıda insannı seferber etmege imkân bere, dep hulâsa çıqardı. Rusiye sakinleri celpnameler saylanmayıp kele, dep bildirgen edi: askerlik yapmağan babalarğa, saqatlığı olğan insanlarğa ve atta vefat etkenlerge.
Rusiyede sentâbrniñ 21-nde seferberlik ilân etildi. Rusiye prezidenti Vladimir Putin onı «qısmiy» dep adlandırdı, askerlik yapqan ve arbiy tecribesi olğanlar seferber etilecek, dep ayttı. Faqat bir talili ve azırlığı olmağanlar seferber etildi ve cebege yollanıldı.
Keçken afta Ukrayına Silâlı quvetleriniñ Baş ştabı, Rusiyeniñ arbiy-siyasiy reberligi qısmiy seferberlikni resmiy şekilde bitire, amma bazı Rusiye vatandaşlarına celpnameler berile.
Bundan ğayrı, Ukrayınadaki cebede seferber etilgenlerniñ ölümleri aqqında haberler kele.
Pentagon, Moskvağa ilân etken yedekteki arbiylerniñ seferber etilüvine irişmek zor olacaq, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
