Cuma kününe keçer gecesi Dniproğa raketa darbesi endirildi, mesken kvartal ve naqliyat müessisesi zarar kördi, can bergenler bar, dep bildire yerli memuriyet. Gece raketa darbesi aqqında Mıkolayıv akimiyeti de bildirdi: doquz qatlı ev viran etildi, anda insanlarnıñ olması büyük ihtimal.
Dnipropetrovsk vilâyetiniñ memuriyet yolbaşçısı Valentin Rezniçenko Telegram kanalında Dniproğa kerçekleştirilgen raketa darbelerinden soñ bir kişi elâk oldı, beş insan yaralandı, dep yazdı. Bundan ğayrı, onıñ aytqanına köre, mesken kvartal ve naqliyat müessisesi zarar kördi.
«Duşman raketaları naqliyat müessisesini yoq etti. Darbeden soñ çıqqan yanğından 52 avtobus yandı, daa 98 danesi zarar kördi», – dep yazdı Rezniçenko.
Dnipro şeer yolbaşçısı Boris Filatov naqliyat müessisesine «İskander» raketalarınen ücüm etildi, dep qayd etti.
Şeerde «bir qaç çoq qatlı bina, gimnaziya, tükân ve memuriy binalar zarar kördi», dep qayd etti Rezniçenko. Bundan ğayrı, vilâyet memuriyetiniñ yolbaşçısı tarif etkenine köre, Rusiye Federatsiyasınıñ ordusı «Grad» ve ağır toplardan Nikopol rayonına üç darbe endirdi.
Cumaaqşamı kününe keçer gecesi Dnipro raketa ateşine oğradı. Rezniçenko aytqanına köre, dört insan elâk oldı, aralarıda 8 yaşında oğlançıq ve 9 yaşında qızçıq bar.
Mıkolayıv vilâyetiniñ memuriyet yolbaşçısı Vitaliy Kim Telegram kanalında cuma kününe keçer gecesi Mıkolayıv rayonında yedi patlav oldı, dep yazdı, eñ az ekisi şeer tışında oldı. Onıñ aytqanına köre, eki raketa mesken rayonğa, bir danesi doquz qatlı evge tüşti. «Ciddiy zararlar, insanlar bar», – dep yaza Kim.
Kim viraneler altında qalğan qadınnı qurtardı, dep bildirdi. Sekiz kişi yaralandı. Akimiyet zarar körgenlerniñ sayısını bilmek içün ev sakinleriniñ cedvellerini teşkere.
Rusiyeniñ Ukrayınağa qarşı büyük ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine ava darbelerini endire. Moskva vatandaşlarğa ücüm etkenini inkâr ete.
BM sentâbrniñ 25-ne qadar Ukrayınada Rusiyeniñ büyük ücümi neticesinde 14 844 insannıñ zarar körgenini tasdıqlap oldı: 5996 kişi elâk oldı ve 8848 insan yaralandı. BM, kerçek raqamlar daa yüksek, dep tüşüne.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
