“Qırım birdemligi” cemiyet birleşmesiniñ faalcileri “Yaz, ümmetim” aktsiyasını ilân etti. Onıñ maqsadı - qırımlı siyasiy mabüslernen mektübiy qonuşmanı qolaylaştırmaq. Bunıñ aqqında faalci Lutfiye Zudiyeva Qırım.Aqiqat muhbirine haber etti.
Onıñ sözlerine köre, teşebbüs şimaliy Qırımda peyda oldı. Anda bir qaç faalci, ayrı-ayrı mabüske degil de, episine beraberlikte bayramlar ve şahsiy tarihler ile hayırlap mektüp yazmağa ve otkrıtkalarnı yollamağa qarar aldı.
“Yigitlerimiz ne qadar çoq mektüp alsa, o qadar çoq qol tutqanımıznı duyacaq. Şimdi olar tek Qırımdan degil de, qıta Ukraina, Türkiye, Latviyadan mektüp ala. Bu teşebbüs devamlı olması, mektüplerniñ toqtamadan kelmesi pek müim, çünki olar apishanelerde yıllarnen otura ve qol tutuvğa daima ihtiyacları bar. İnanam ki, öz vaqtında “Qırım marafonı” kibi, bu teşebbüs da muvafaqiyetli olur”, - dedi Zudiyeva.
Faalci qayd etti ki, “mektüp masası” “Qırım birdemligi”niñ er toplaşuvında çalışacaq ve mabüslerge mektüp yazmağa ve otkrıtka imzalamağa çağırttı, çünki olar içün bu - “taş divar artında eñ büyük ümüt”.
Bundan ğayrı, Zudiyeva, teşebbüs teşkilâtçılarınıñ er qırımlı siyasiy mabüsine SİZO ve koloniyalarğa yollacaq Qurban bayramnen hayırlav otkrıtkalarını kösterdi.
2017 senesi iyül ayında «Qırım birdemligi» birleşmesi, Qırımda siyasiy mabüsler ve cemiyet faaliyetçilerine qol tutmaq maqsadınen «Qırım marafonı» çerçivesinde para toplanıp başlağanını ilân etken edi. Tedbir teşkilâtçılarınıñ niyetine köre, «pervasız olmağanlarnıñ birdemligi»ni köstermek içün paranı 10 Rusiye rublesi (qararnen 4 hrivna – QA) qıymetinde maden aqçalar ile toplaylar.
Aq-uquq qorçalayıcılarınıñ malümatına köre, bugün Rusiye territoriyasında ve onıñ tarafından işğal etilgen Qırımda 60 qadar Ukraina vatandaşı siyasiy sebepten azatlıqtan marum etildi. Ukrainanıñ Tış işleri nazirligi Rusiyege, anda bulunğan Ukraina vatandaşlarını azat etmek talabınen 300 resmiy mektüp yolladı.
