Aqmescit SİZOsında “Veciye Kaşka davası” boyunca qabaatlanğan qırımtatar faalcisi Asan Çapuh, ihtisaslı tibbiy yardımnı talap eterek, açlıq narazılığını toqtattı. Bunıñ aqqında Azatlıq Radiosınıñ rus bölüginiñ mühbiri Facebook ağında haber etti.
Beyanatqa köre, Çapuh, ğayet yaramay sağlıq alı olğanı ve advokatı Ayder Azamatovnıñ ricası içün açlığını toqtattı.
Qırım.Aqiqat, Asan Çapuhnıñ qorantası ve advokatından onıñ alı aqqında haber almağa tırışa.
Bir kün evel Ukraina Tış işler Nazirligi (TİN), açlıq tutqan “Veciye Kaşka davası”nıñ iştirakçisi, qırımtatar faalcisi Asan Çapuhnıñ deral azat etmesini Rusiyeden talap etti.
2017 senesi dekabr ayında faalci Asan Çapuh SİZOda mikroinsult keçirdi ve acele sürette hastahanege yatqızılmaqta muhtac edi.
Keççe mabüsniñ tibbiy baqıluvı yapıldı, amma onıñ sağlıq alı ve diagnozı advokatına bildirilmedi.
2017 senesi noyabrniñ 23-nde Aqmescitte Rusiye telükesizlik hadimleri – Kâzim Ametov, Asan Çapuh, Ruslan Trubaç ve Bekir Degermenci kibi bir gruppa qırımtatarnı tutıp aldı.
Sentâbrniñ 11-nde Rusiye nezaretindeki Aqmescit Kiyev rayon mahkemesi, "Veciye Kaşka davası"nıñ iştirakçilerini eki ayğa daa apiste qaldırdı. Olar Türkiye vatandaşı Yusuf Aytandan para talap etüvde şeklene. Rusiye telükesizlik hadimleri olarnı tutqan maalde qırımtatar milliy areketiniñ veteranı Veciye Kaşka yaramay. Daa soñra qadın vefat ete.
Qırımtatar milliy areketiniñ faali Nariman Celâl, Türkiye vatandaşı, Veciye Kaşkanıñ qorantasından para hırsızlağan edi, dep bildire.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen "Hizb ut-Tahrir" teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
