Oktâbr 4-ünde Aqmescitten (Simferopol) Sankt-Peterburğa yol tutqan uçaq, yolculardan birisi ozünı yaramay duyğanı sebebinden Rostov-na-Donu rusiye şeerinden mecburiy qondı. Soñundan o yolcu vefat etti. Bu aqta Rusiye tahqiqat komitetiniñ Cenüp tahqiqiy idaresiniñ matbuat hızmeti haber etmekte.
“2018 senesi oktâbr 4-ünde, tahminen saat 12:40 Aqmescit - Sankt-Peterburg reys uçağı, bir yolcu özüni yaramay duyğanı içün, Rostov-na-Donu şeeriniñ “Platov” ava limanında mecburiy qonmasını talap etti. Uçaq qonğanından soñ, aqayğa tibbiyet hadimleri aşıqtı, faqat yardım etmege yetiştirmedi, saat 13:00 aqay keçindi. Alınğan ilk malümatqa köre, ölüm sebebi yürek-damar yetersizligi olğan”, - denile beyanatta.
Müessise bildirgenine köre, adiseniñ bütün tafsilâtını ögrenmek içün teşkerüv tedbirleri keçirile. Olarnıñ neticesinde, usul qararı alınacaq.
Avgust 8-inde Aqmescitten Sankt-Peterburğa ketken “Rusiye” şirketiniñ uçağı, uçaqta qadın bala tapqanı sebebinden, Rostov-na-Donuda mecburiy qondı.
Aprel 16-sında Aqmescitte ava limanınıñ yañı terminalı açıldı. Onı 22 ayda ve deyerli 500 million rublege qurdılar.
2014 senesi mart ayında Rusiye Qırımnı işğal etkeninden soñ, Ukraina akimiyeti qararınen Qırım ava limanları qapatılğan edi. Anda ve andan yapılğan er uçuş Ukraina qanunları ve halqara qaideleriniñ bozulıvı sayıla.
