Saq rayonında, Hersondan Aqyarğa yol tutqan mikroavtobus iştiraginen yol qazası yüz berdi. Qaza neticesinde 6 bala zararlandı, episini hastahanege alıp kettiler. Bunıñ aqqında rusiye haber agentlikleri bildire.
Qırımda rusiye FVN matbuat hızmeti, yol qazası bugün saba olğanını haber ete. Mikroavtobus Saq rayonında, Nizinnoye köyü yanında qazağa oğradı.
“Altı bala zararlandı, eñ büyügi 15 yaşında. Bir altı yaşlı qızçıq reanimatsiyada, qalğanları travmatologiya bölügünde”, - dep rayon memuriyetine esaslanıp bildire TASS agentligi.
Haber etilgeni kibi, mikroavtobusta eñ azı sekiz adam edi. Olardan yedisi - 6 - 13 yaşındaki balalar.
Alınğan ilk malümatqa köre, Saq rayonında çevirilgen şahsiy mikroavtobusnıñ aydayıcısı dümende yuqlap qaldı dep TASS agentligine haber ete rayonnıñ rusiye başı Galina Miroşniçenko.
Qırım.Aqiqat qazanıñ tafsilâtını bilmege tırışa.
