Qırımnıñ rusiye akimiyeti köylerde cıyma modullerden sport zallarnı qurmağa istey, bunı, İslâm terek (Kirovskoye) rayonınıñ Küleç Meçit (Novopokrovka) köy mektebinde cıyma sport zalı açılışında, Kreml nezaretindeki Qırım memuriyetiniñ başı Sergey Aksönov haber etti.
Aksönovnıñ matbuat hızmetiniñ haber etkenine köre, Küleç Meçit köyündeki sport zalı “Mriya” sanatoriy-kurort komleksi ve “Gorizont-Servis” şirketi maddiy destegi ile açıldı.
“Bu leyhanı temel olaraq alıp, ondan örnek leyhasını yapıp, çoqlaştırmız. Çünki bu qolay: cıyma modullerden sport zalı qısqa vaqıtta qurula, 50 yılğace hızmet eter”, - dep qayd etti Aksönov.
Onıñ aytqanına köre, şimdilik Qırımda sport inşaatları yeterli degil.
Aqyarda, keçken yılı sport inşaatlarnıñ qurulıvından iqtisat etilip qalğan 2 million rublege (qararen 920 biñ grivna - QA), 10 bala meydançığı qurmağa niyetleneler.
