Oktâbr 31-inde Qarasuvbazarda (Belogorsk), Qırım ressamı Ramiz Netovkinniñ hatırasını saqalamaq içün tizilgen teşebbüs gruppasınıñ ilk toplaşuvı keçirildi. Bu aqta Qırım.Aqiqat mühbiri haber etmekte.
Teşebbüs gruppasınıñ azaları, faaller Eskender İlyasov, Leman İbraimova ve “Svobodnıy Krım” areketiniñ başı Vitaliy Homutov oldı.
“Belli Qırım ressamı Ramiz Netovkinniñ keçingeninden soñ yedi yıl keçti. Eki yıldan o 60 yaşını tolduracaq edi. Bugün biz, onıñ aqqında hatıranı saqlamaq içün teşebbüs gruppasını yarattıq. İzçen areketler planını işletip çıqaracaqmız. Ramiz Netovkinniñ adı, resimlerinden ğayrı da ölümsiz qalğanını lâyıq. Daa 2013 senesi, Qarasuvbazar şeeriniñ strategik inkişafı programmasına, ressam evinde onıñ müzeyini yaratmaq maddesi qoşulğan edi, amma bu madde daa ömürge keçirilmedi. Eminmiz ki, ressam tuvğan Qarasuvbazar şeerinde abidesi qoyulmasına da lâyıq" - dey İlyasov.
Ramiz Netovkin 1960 senesi Taşken vilayetiniñ Almazar qasabasında doğğan. 1975 senesinden başlap o Qırımda yaşağan. 1980 senesi N.S. Samokiş adına Aqmescit bediiy oquv yurtunı bitirgen. Bekir Çoban Zade mukâfatınıñ “Qarasuvbazarnıñ keçmişi, bugüni ve kelecegini akis etken eñ güzel eser” kategoriyasında “Qarasuvbazar civarları” albomı icün ğalibi.
1983 senesinden - vilâyet, cumhuriyet ve çetel sergilerinin faal iştirakçisi. Şahsiy sergileri Aqmescit, Bağçasaray, Kezlev, Aluşta, Moskova, Tartu (Estoniya), Varşava, Lüblin (Poloniya), Nyü-York, Kastamonu (Türkiye) şeerlerinde keçti.
Ressam 2011 senesi iyül 16-sında vefat etti.
