Qırımda Tarhan Qut burnunıñ yanında deñiz tübünde 1920 senesiniñ “Çetvörtıy” adlı gemisini taptılar, tıştan o zırhlı gemi ya da tarama gemisine oşay. Bunıñ aqqında “Neptun” rusiye suv tübü ekspeditsiyasınıñ reberi Roman Dunayev haber etti.
“Keçirilgen araştırmalardan soñ, deñiz tübünde evel bilinmegen gemi tapıldı. Tafsilâtlı tetqiqlerden soñ, ekspeditsiyanıñ dayverleri geminiñ adını oqup oldı”, - Dunayevniñ sözlerinden yaza TASS.
Onıñ aytqanına köre, şimdilik geminiñ ögrenilmesi devam etmekte. O qayd etti ki, ileride bu gemi dayverler içün meraqlı bir ziyaret yeri ola bile.
Avgustnıñ başında “Neptun” suv tübü ekspeditsiyası Balıqlava yanında batqan tahtalı gemini tapqanları aqqında haber etken edi.
Fevralde Aqyar yanında rusiye atiqiyatçıları, tahminen Roma vaqtından qalğan, qadimiy geminiñ qalıntılarını tapqan edi.
Ukraina Medeniyet Nazirligi, işğal etilgen Qırımda Rusiye areketleri, yarımadadaki Ukraina medeniy mirasına zarar ketire dep iddia ete. Böyle areketler “Medeniy mirasnıñ qoruvı aqqında” qanunnı ve 1972 senesi UNESCO Konventsiyasını boza.
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
