Kreml nezareti altındaki Qırım Kurort ve turizm nazirligi, Qırımğa yılnıñ başından berli 5,6 million turist kelgenini qayd ete.
“2018 senesiniñ başından itibaren sentâbrniñ 10-una qadar,Qırımda 5,6 million turist raatlandı, bu - keçken yılnıñ raqamlarından 30%-ğa ziyadece. Olardan 885 biñ - Ukraina vatandaşları”, - dep qayd ete müessiseniñ matbuat hızmeti.
Qırım Kurort ve turizm naziri Vadim Volçenkonıñ sözlerinden, yarımadanıñ musafirhane ve sanatoriylerinde yerler “dekabrge qadar sımarlana”.
“Noyabr-dekabr aylarına eñ çoq yer sımarlanıla. Sımarışnı red etkenler yoq deseñ olur”, - dep haber ete Volçenko sözlerinde matbuat hızmeti.
Baqıñız: İşğalden soñ dört yaz: tatil mevsimi Qırımda nasıl deñişe edi (resimli haber)
Qırımda raatlanğanlarnıñ sayısı aqqında mustaqil menbalarda bir malümat yoq.
Avgustnıñ 21-nde Devlet sıñır hızmetiniñ Aqaz-Qara deñiz bölgesiniñ idaresi, rusiyeli Qırım akimiyeti Ukrainanıñ qıta qısmından kelgen turistlerniñ sayısını qabarta dep haber etti Qırım.Aqiqatqa .
Daa evel Rusiye ve Qırım matbuatları, turizm komitetiniñ başı Aleksey Çernâknıñ sözlerinden, avgustnıñ başınace Qırımda 830 biñ Ukrainanıñ qıta qısmından kelgen turist raatlandı dep bildirgen edi.
