Ukrayina cenk sebebinden ailelerinden ayırılğan daa beş ukrayinalı balanı qaytarğan. Bir bala da Rusiyege qaytqan. Bunı Rusiye bala aqları vekâletlisi Mariya Lvova-Belova bildirdi.
Bu Qatarnıñ aracılığı vastasınen olğan.
Bundan evel oktâbrniñ ortasında 17 yaşqa qadar eki bala evine qaytıp olğan edi. O vaqıt Lvova-Belova Moskva Ukrayinanıñ 30 muracaatını baqmaqtadır, dep bildirgen edi.
Onıñ sözlerine köre, arbiy areketer sebebinden Rusiyege ve Ukrayinanıñ nezareti astında olmağa topraqlarğa eki biñ öksüz bala tahliye etilgen edi. Biraz soñra olardan 1300 bala evlerine qaytqan, qalğanları evlâtlıqqa alınğan.
Ukrayina akimiyetiniñ malümatına köre, Rusiye ana-babasınıñ ya da vasiyniñ izni olmadan 19 biñden çoq balanı alıp çıqarğan.
Martnıñ 17-nde Halqara ceza mahkemesiniñ Başlanğıç mahkeme palatası Rusiyeniñ Ukrayinağa qarşı cenki köntekstinde eki insan içün tevqif orderini çıqardı. Bular Rusiye prezidenti Vladimir Putin ve Rusiye prezidenti yanında bala aqları vekâletlisi Mariya Lvova-Belova. Olar Ukrayinanıñ işğal etilgen topraqlarından ealiniñ (balalarnıñ) qanunsız sürgün etilmesi ve ealiniñ (balalarnıñ) qanunsız şekilde Rusiyege köçürilmesi kibi cenk cinayetlerini yapqanı ile şubeli sayılalar.
Ukrayina Baş prokurorı ofisi Halqara ceza mahkemesiniñ qararını alğışladı ve "Ukrayin ve bütün halqara uquq sisteması içün tarihiy" dep adlandırdı.
Evel Kremlde Gaagadaki Halqara ceza mahkemesini ve onıñ yurisdiktsiyasını tanımaycaqlarını bildirgen ediler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
