Rusiye prezidenti Vladimir Putin «Avropanı nükleer silânen açıq-açıq qorquzdı». Bu aqta ABD prezidenti Joe Biden New Yorktaki BM Baş assambleyasında çıqışta bulunıp ayttı.
Biden Ukrayınada «bir insan istegen deşetli, kerekmegen bir cenk» kete, dep hatırlattı.
«BM Telükesizlik şurasınıñ daimiy azası qomşusınıñ toprağına kirdi, suveren bir devletni dünya haritasından silmege tırıştı. Rusiye BM nizamnamesiniñ esaslarını utanmayıp bozdı», – dep qayd etti ABD prezidenti.
Biden Putinniñ qısmiy seferberlik ilân etmek qararını ve, ABD prezidentiniñ aytqanına köre, Kreml Ukrayınanıñ topraqlarını ilhaq etmek içün keçirgen sahte referendumlarını izaatladı.
«Putin Rusiye telükede olğanı içün böyle areket etmege mecbur edi, dep ayta, amma Rusiyeni kimse telükege oğatmadı. Rusiyeden ğayrı, iç kimse zıddiyet olmasını istemedi», – dep ayttı Amerika lideri.
Biden, Rusiyeniñ Ukrayına vatandaş ve medeniyet obyektlerine yapqan ücümlerini, Ukrayına vatandaşlarınıñ kütleviy öldürüvini takbih etti. «Bu cenk Ukrayınanı devlet olaraq bar olma aqqından marum etmek içün yapıla», – dep qayd etti ABD prezidenti.
Biden Ukrayınağa daa bir kere qoltutıp, ABD er kes içün adaletli şartlarda cenkniñ bitmesini istey, dep qayd etti. Washington Rusiye NATO memleketlerine ücüm etmesin dep, ittifaqdaşlarınen sıqı çalışa, dep ayttı Biden.
Sentâbrniñ 21-nde Vladimir Putin Rusiye «topraqlarını» qorumaq içün «elindeki vastalarını» qullanmağa azır, dep bildirdi. Putin işğal etken Ukrayına topraqlarını da «özüne ait» dep saya.
Sentâbrniñ 20-nde işğal altındaki Lugansk, Donetsk, Zaporijjâ ve Herson vilâyetlerinde Rusiye quvetleri Rusiyege qoşuluv «referendumını» belgiledi. İşğalci akimiyet sahte referendumlarnı sentâbrniñ 23-27-nde keçirecek.
Kyiv bu tedbirlerniñ kerçek aqibetleri olmaycaq, dep bildirdi, Ukrayına Tış işler nazirligi ise halqara ortaqlarını Rusiyeniñ işğal altındaki topraqlarda «sahte rey berüvlerni» keçirmek niyetini takbih etmege çağırdı.
İşğal etilgen Ukrayına topraqlarında sahte referendumlar tanılmaycağını Avropa parlamenti, Beyaz saray ve NATO aytqanlar.
Amerika Cenkni tedqiq etüv institutı, Kremlniñ işğal etilgen Ukrayına topraqlarında sahte referendum keçirmek planları iç seyirci içün yapıla, Moskva Rusiye ordusınıñ şekillenüvini eyiliştirmege tırışa, dep tüşüne.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
