Link açıqlığı

Saatnıñ esas haberi

Prıstayko: Türkiye, Putin İstanbulnı ziyaret etkende Qırımnıñ işğalden boşatuvı meselesini muzakere etmege söz berdi


Qırımnıñ işğalden boşatuvı ve Rusiyede qanunsız tutulğan ukrainlerniñ azat etilüvi meselesi yanvarniñ 8-inde Vladimir Putin İstanbulnı ziyaret etkende köterilecek ola.

Bunı Ukraina tış işler naziri Vadim Prıstayko Türkiye TİN-niñ başı Mevlüt Çavuşoğluna atıf etip öz Twitterinde haber etti.

"Zenaatdaşım, Türkiye, Putinniñ bugünki ziyaretinde Qırımnıñ işğalden boşatıluvı ve Rusiyede qanunsız tutulğan ukrainlerniñ azat etilüvi meselesini köterecegini qayd etti", - yazdı Prıstayko.

Türkiye TİN-niñ başından bu malümatnıñ tasdıqı şimdilik yoq.

Yanvarniñ 8-inde Rusiye ve Türkiye prezidentleri Vladimir Putin ve Recep Erdoğan İstanbulda, Rusiyeniñ Krasnodar ülkesinden Türkiyeniñ Avropa qısmına Qara deñizniñ tübünden keçirilgen "Türkiye aqıntısı" gaz hattını tantanalı şekilde açacaqlar.

Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.

XS
SM
MD
LG