Qırımda sürgün etilgen ukrayin balalarnı qıdırğan bir kişi yaqalandı ve iskencelerge oğratıldı. Bunı "Regional insan aqları merkezi" cemaat teşkilâtından Yekaterina Raşevskaya Avropada işbirlik ve telükesizlik teşkilâtınıñ İnsan ölçüsi konferentsiyası vaqıtnda bildirdi, dep haber ete Qırım.Aqiqat mühbiri.
Onıñ malümatına köre, bu vaqiadan soñ cemaatçılıq yarımadada bu kibi malümatnı toplamamaq qararına kelgen, çünki bu pek telükelidir. Aynı zamanda, Raşevskayanıñ sözlerine köre, balalarnıñ sayısını belgilemege yardım etken bir çoq malümat Rusiye propagandistleri tarafından yayınlana. Amma çoqusı allarda Rusiye akimiyeti balalarnıñ malümatını deñiştire ve soñra olarnı tapmaq imkânsız ola.
"Areket etmelimiz. Rusiye Jeneva şartnamesiniñ talaplarını yerine ketirmeli. Bunıñ olması içün içün er kes oña tazyıq etmeli. Bundan ğayrı BMT Baş Assambleyası buña dair ayrı qarar qabul etmeli. Soñra da bunı nezaret eteceke ve balalarnıñ Ukrayinağa qaytarılması ile oğraşacaq üçünci tarafnı tayin etmeli", - dep bildirdi o.
Uquq qoruyıcılarnıñ malmüatına köre, Rusiye ve Belarus territoriyasına 19 546 ukrayi balası mecburiy şekilde çıqarlğan. Bir buçuq yıl içinde tahminen 300 bala qaytarılğan.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
