Ukraina prezidenti Petro Poroşenko, Rusiye tecavuzından bir sıra vilâyette ilân etilgen 30 künlük cenk vaziyetini şimdilik devam etmemek qararını aldı. Bu aqta o, dekabr 26-sında Ukraina SNBO oturışında ayttı.
“Ne içün onı (cenk vaziyetini) devam etmemek qarar aldım, çünki şimdi eki telükemiz bar: bir taraftan - doğrudan arbiy tecavuzı telükesi ve biz şimdi oña qarşılıq köstermege daa pek azırmız, başqa taraftan ise - vatandaşlarımıznıñ demokratik aq ve serbestligine suiqast etüv. Men, prezident olaraq, vatandaşlarımıznıñ anayasa uquqları qorumasına kefil olmam kerek, şu cümleden saylav aqqına da”, - dedi Poroşenko.
Ukraina prezidenti, “prezident saylavı 2019 senesi mart 31-inde keçirilecegini kefil etem” dep qoştı.
Ukraina Yuqarı Radası, noyabr 26-sında aqşam bir sıra vilayette Azaq ve Qara deñizleriniñ içki suvlarında cenk vaziyetini ilân etti.
Cenk vaziyeti 10 vilâyette ilân etile. Bu -Vinnitsa, Lugansk, Mıkolayiv, Odessa, Sumı, Harkiv, Çerniğiv, Herson, Donetsk, Zaporijjâ vilâyetleri ve Azaq ve Qara deñizleriniñ içki suvları.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Kreml kontrolindeki Aqmescitniñ Kiyev rayon mahkemesi 24 Ukraina deñizcisini 2019 senesi yanvarniñ 25-ne qadar apiske aldı. Keriç hastahanesinde bulunğan daa üç deñizcini Keriç şeer mahkemesi apiske aldı. Olar da 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile.
Qırım Muhtar Cumhuriyetiniñ prokuraturası Rusiyeniñ FSBsi tarafından tutılğan Ukraina deñizcilerini cenk esiri olaraq tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
