Rusiye akimiyeti ve quvetçileri işğal etilgen Qırımnıñ arbiy qoruluvını temin etemeyip, «Hizb ut-Tahrir davasına» ilk sefer «Ukrayına izini» bere. Bu fikrini advokat Nikolay Polozov Qırım.Aqiqatqa ayttı.
Avgustnıñ 17-nde Qırımnıñ Rusiye yolbaşçısı Sergey Aksenov Canköy ve Yaltada Rusiyede yasaqlanğan «Hizb ut-Tahrir» teşkilâtı ile alâqaları bar olğanında qabaatlanıp tutulğan altı insannı esas Ukrayınadan «koordinatsiya etilgen» «terrorist» dep adlandırdı.
Polozovnıñ fikirince, Qırımda «böyle laflar birinciden işğalci akimiyetniñ küçsüz açuvı ve qorqusı aqqında ayta».
«Olar uzun vaqıt devamında Qırımnıñ arbiy qoruluvı aqqında ayttılar. Şimdi sözleri yalan çıqqan soñ, Qırımnıñ de o, de bu tarafında Rusiye arbiy obyektleri patlatılğanda, ealini ve özüni tınçlandırmaq içün Qırım akimiyeti muvafaqiyetsizliginiñ qabaatlılarını qıdıra. Yerli quvetçilerge büyük faaliyet köstermege, insanlarnı tutıp apiske almağa emir etilgendir. Rusiye quvetçileriniñ çalışmağa ne imkânı, ne de istegi bar, şunıñ içün qırımtatarlarğa qarşı repressiya yapalar, çünki sekiz yıl devamında azırlıqları büyük oldı. İşanılmaycaqlarnıñ cedveli çoqtan tizildi», – dedi advokat.
Polozov, «bu azırlıqlar Ukrayına tarafından arbiy telükelerge qarşı «muvafaqiyetli» bir şey olaraq kösterilecektir», dep qayd etti.
«Ebet, bu faaliyetniñ fiyatı – putin Rusiyesiniñ repressiv maşinasına oğrap bozulğan insan ayatları», – dep qayd etti advokat.
Avgustnıñ 11-nde saba faaller işğal altındaki Qırımda Rusiye quvetçileri qırımtatarlarnıñ evlerini tinte, dep bildirdi. Advokatlarğa kirmege izin berilmedi, bazı yerlerde cep telefonı bağı söndürildi. Altı er adamı – Vilen Temeryanov, Enver Kroş, Seitâya Abbozov, Murat Mustafayev, Edem Bekirov ve Rinat Aliyev Rusiyede yasaqlanğan «Hizb ut-Tahrirde» iştirak etkeninde qabaatlanıp tutuldı.
Advokat Emil Kurbedinovnıñ malümatına köre, Rusiye FSBsiniñ hadileri Canköy rayonında tutulğan Enver Kroşnı kötekledi ve işkencege oğrattı. Rusiye quvetçileri işkence aqqında malümatnı izaatlamay.
Rusiye kontrolindeki Aqmescitniñ Kyiv rayon mahkemesi tutulğan qırımtatarlarnı 2022 senesi oktâbrniñ 10-na qadar apiske aldı.
Ukrayına prezidentiniñ Qırım Muhtar Cumhuriyetindeki temsilciligi qırımtatarlarnıñ evlerinde keçirilgen yañı tintüvlerni takbih etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
