«Qırım platforması» ve BM organları vastasınen Rusiyege Qırımtatar Milliy Meclisi reisiniñ birinci muavini Nariman Celâlnı azat etüvnen bağlı muracaatı Kremlniñ bu meselede fikrini deñiştirmeycektir. Böyle fikirni aq qorçalayıcı ve advokat Nikolay Polozov Qırım.Aqiqatqa ayttı.
Onıñ qayd etkenine köre, Celâlnıñ davasında Qırımtatar Milliy Meclisiniñ reis muavinleri Ahtem Çiygoz ve İlmi Umerovnı azat etüv emsaline esaslanmalı.
«Kremlniñ fikri deñişmeycektir. Putin halqara teşkilâtlarnıñ işğal etilgen Qırımda repressiyalarnı qullanuv ile bağlı aytqanlarına qulaq asmay. Bunıñnen beraber, Ahtem Çiygoz ve İlmi Umerovnen olğanı kibi, bazı cinaiy davalar ve siyasiy mabüsler aqqında laf ketse, bazı devlet yolbaşçıları Putinnen müsbet añlaşmalar yapa bilgenini bilemiz», – dep qayd etti advokat.
Ukrayına Tış işler naziriniñ birinci muavini Emine Ceppar «Qırım platformasınıñ» iştirakçi devletleri sentâbrniñ 30-nda BM insan aqları şurasında Rusiyeni halqara gumanitar uquq çerçivesinde mecburiyetlerini yerine ketirmesine, Qırımda ve Rusiyede adaletsiz bir şekilde tutulğan ve apiske alınğan Ukrayına vatandaşlarını, hususan Nariman Celâlnı acele azat etmesine ve 2017 senesiniñ BM Halqara mahkemesiniñ Qırımtatar Milliy Meclisiniñ faaliyetini yasaq etüv qararını lâğu etmesine ve regional ve halqara monitoring mehanizmleriniñ Qırımğa kirmesini temin etmege çağırdı.
Rusiye kontrolindeki Qırım Yuqarı mahkemesi sentâbrniñ 21-nde Anğarada «gaz borusındaki diversiya davasınıñ» mabüslerini uzun apis müddetlerine üküm etti: Nariman Celâl 17 yılğa ve 700 biñ ruble para cezasına, Asan Ahtemov 15 yılğa ve 500 biñ ruble para cezasına, Aziz Ahtemov 13 yılğa ve 500 biñ para cezasına üküm etildi.
Ukrayına Tış işler nazirligi, Ukrayınanıñ Qırım Muhtar Cumhuriyetindeki temsilciligi, Qırımtatar Milliy Meclisi ve aq qorçalayıcılar Celâl ve ağa-qardaş Ahtemovlarğa çıqarılğan ükümni takbih ettiler.
Qırımtatar halqınıñ lideri Mustafa Cemilevniñ Qırım.Aqiqatqa bildirgenine köre, o, Celâlnı Rusiye apsinden azat etüv meselesini Türkiye prezidenti Recep Tayyip Erdoğannen muzakere etmege niyetlene.
Avgustnıñ 23-nde «Qırım platforması» ekinci halqara sammitiniñ iştirakçileri Rusiyeni Nariman Celâlnı ve bütün qırımlı siyasiy mabüslerni azat etmesine çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
