Qırımda bellisiz şahıslar 65 yaşındaki qırımtatarı Cafer Ablâmitovnıñ evine kirip, onı belli olmağan yerge alıp kettiler. Qırımtatar Milliy Meclisiniñ reisi Refat Çubarovnıñ bildirgenine köre, bu noyabrniñ 19-nda oldı.
Onıñ aytqanına köre, olardan dörtü arbiy urbada, daa ekisi qara urbada edi eken. Bunıñen beraber olarnıñ maşnalarında nomerler yoq edi. Çubarovnıñ aytqanına köre, bellisiz şahıslar Ablâmitovnıñ bazı şahsiy eşyalarını da alıp ketkenler.
"O vaqıttan berli Cafer Ablâmitovnıñ tuvğanları onıñ bulunğan yerini bilmey. Bundan da ğayrı, olarnıñ işğalci "uquq qoruyıcı organına" yollağan, bütün tafsilâtlarnı añlatqan insan ğayıp olğanı aqqında arizası da bir netice bermedi", — dep yazdı Çubarov.
Meclis reisiniñ qayd etkenine köre, Ablâmitovnıñ hronik yürek hastalığı bar, bunıñ içün ayatı telüke astında.
İşğal etilgen Qırımda qırımtatarlarnıñ evlerinde muntazam sürette tintüvler keçirile. Silâlı quvetler ve Rusiye akimiyeti olarnı "Ukraнina ile alâqaları" ya da "terroristik faaliyetinde" qabaatlay. Aq qorçalayıcılar ve Ukraнina akimiyeti bu qabaatlavlarnı siyasiy sebepli dep saya.
Qırımtatar resurs merkeziniñ bildirgenine köre, 2017 senesinden başlap Rusiye tarafından işğal etilgen Qırımda 10 018 insan aqlarınıñ bozuluvı qayd etildi, 6 730-ı qırımtatar halqınıñ vekillerine nisbeten.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
