Qara deñizde yanıp turğan eki tankerden zararlanğan deñizcilerni alâ daa hastahanege alıp barmadılar. Qırım Qaza tibbiyeti merkeziniñ müdiri Sergey Olefirenko bildirgenine köre, yaralanğanlarnı tek üyleden soñ Keriç limanına alıp baracaq olalar.
“Yaralanğanlarnı yedi gemiden toplaylar, olar deñizde tarqalğan, yan-yanaşa degiller. Gemi kapitanınıñ tahminine köre, olar zararlanğan deñizcilerni saat üçten beşkece Keriç limanına ketirirler, biz ise olarnı anda beklecemiz. Yani, saat üç-dörtte adamlar, niayet, yardım körer”, - dep yaza Olefirenkonıñ sözlerinden “İnterfaks” habet agentligi.
Rusiye matbuatınıñ deñiz hızmetlerinde menbaası bu malümatnı tasdıqladı: “Merkuriy” buksiri reydde, alâ daa adamlarnı gemilerde toplay”, - dedi o.
Qırımnıñ Rusiye yolbaşçısı Sergey Aksenovnıñ bildirgenine köre, Keriç boğazında yanğan eki gemide 14 deñizci elâk oldı.
Yanvarniñ 21-nde Qırım yalısında Tanzaniya bayrağı altında «Maestro» ve «Kandi» tankerlerinde patlav ve yanğın oldı.
«Maestro» tankeri Rusiyeniñ Temrük şeerine kete edi, anda 14 Türkiye ve İndistan vatandaşı bar edi. «Kandi» tankerinde 17 insan bar edi – olap da Türkiye ve İndistan vatandaşları. Ukrainalı jurnalist Andriy Klımenkonıñ aytqanına köre, tankerler «ABD Suriye sanktsiya cedvelinde» olğan Milenyum Denizcilik Gemi türk şirketine ait.
Rusiye Tahqiqat komiteti Qırım yalısında yanğın neticesinde tankerlerde insanlarnıñ elâk olğanı sebebinden «diqqatsızlıqtan sebep eki ve daa ziyade şahısnı öldürüv» maddesi boyunca cinaiy iş açtı.
Yanğın ve patlavğa oğrağan tankerler qanunsız şekilde Suriyege şingen gaz taşığan edi, dep bildirdi Ukrainanıñ vaqtınca işğal etilgen topraqlar meseleleri nazirligi.
2014 senesi iyül ayında Ukraina ükümeti Rusiye işğal etken yarımadanıñ bütün limanlarını resmiy şekilde qapattı, Qırım limanları halqara gemiler içün qapalı qala.
