«Azovstalniñ» esir alınğan imayecilerinen bağlı muzakereler zor kete, dep bildirdi Ukrayına prezidenti Ofisiniñ reber mesleatçısı Mıhaylo Podolâk. Prezidentniñ ofisi onıñ Helsingin Sanomat fin neşirine bergen intervyüsınıñ tafsilâtlarını aydınlattı.
Podolâk aytqanına köre, Ukrayına Rusiye Federatsiyasınıñ tek esirler ve bazı taktik meselelerde muzakere keçire.
«Azovstal» imayecileri aqqında da laf etemiz, amma zor kete, çünki Rusiye mümkün olğanı qadar büyük propaganda faydasını almağa istey», – dep bildire Ukrayına prezidentiniñ ofisi Podolâknıñ aytqanlarını.
Podolâknıñ fikirince, bu esnasta Qızıl Haç ve BM «zayıflar» ve «daa faal olmalılar».
Vaqtınca işğal etilgen Mariupolde, kütleviy haber vastalarınıñ malümatına köre, avgust ayında Rusiyede terror teşkilâtı olaraq tanılğan ve yasaqlanğan «Azov» polku askerleriniñ mahkemesini keçirmege isteyler. Avgustnıñ başında Life Rusiye neşiri Mariupol filarmoniyasınıñ videosını derc etti. Anda mahkeme içün madeniy qafes qoyğanlar.
Rusiye tarafı Mariupolni imaye etken «Azov» Ukrayına göñülliler polkunıñ askerlerini mahkeme etmege niyetlengenini bir qaç kere bildirgen edi.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
