Qara deñizde Kefe yanında bir qadın battı, dep bildire Rusiye FVN-niñ Qırım idaresi.
Beyanatqa köre, cumaertesi künü, iyün 29-ında bellisiz aqay suvdan yalığa essiz qadınnı çıqardı. Acele yardım maşnası kelgeninen, nevbetçi feldşer, 1984 senesi doğma qadınnıñ ölümini qayd etti.
Bundan ğayrı, tünevin Saq merkeziy hastahanesine suvda boğulğan aqaynı ağır alda ketirdiler.
Yılnıñ başından berli Qırımda umumen olaraq 9 adam suvda elâk oldı. Keçken yılnıñ aynı müddetinde 10 adam batqan edi. Bu aqta Rusiye FVN-niñ Qırım idaresi bildirmekte.
