Qırımda diversiya azırlamasında qabaatlanğan Vladimir Dudkağa Aqmescit SİZOsına mektüpler kelmey. Bunıñ aqqında avgustnıñ 9-ında onıñ qardaşı Pötr Dudka Qırım.Aqiqatqa haber etti.
“Oña oğlu da, kelini de mektüp yazdı. Olar pek sade edi: eki yaşındaki tornu aqqında, turmuş şaraiti aqqında ve buña oşağan başqa şeyler aqqında. Amma bu mektüpler oña kelmey. Şikâyet etmek faydasız. Olarnıñ qaidesi bar: saña yaramay olsa em de şikâyet etsen, saña daa yaramayca yaparlar”, - dep ayttı Pötr Dudka.
SİZO hadimleriniñ bu aqta halq ögünde yapılğan tefsirleri yoq.
İyülniñ 31-inde Kreml nezareti altındaki Aqyar şeer mahkemesi Vladimir Dudka ve Aleksey Bessarabovnıñ apis müddetlerini 6 ayğa uzattı. Olar Qırımda diversiya azırlamasında qaatlandı.
2016 senesi noyabrniñ 9-da Aqyarda «Ukraina Mudafaa nazirligi baş istihbarat idaresiniñ diversion-terroristik gruppasınıñ azaları» Dmitriy Ştıblikov, Aleksey Bessarabov ve Vladimir Dudka yaqalanğan ediler.
2017 senesi noyabrniñ 16-sında Aqyar şeer mahkemesi Ştıblikovnı 5 yıllıq şiddetli rejim koloniyasına ve 200 biñ rublelik (95 biñ grivna) para cezasına mahküm etti.
Ukraina havfsızlıq hızmeti Qırımda tutulğan Ukraina vatandaşları SBU hadimleri olmağanını bildirdi.
