Rusiye prezidentiniñ matbuat kâtibi Dmitriy Peskov bildirgenine köre, vatandaşlarnıñ «qısmiy» seferberlik çerçivesinde arbiy hızmetke alınması yekünlendi, lâkin seferberlik buyruğınıñ bazı maddeleri çalışmağa devam ete.
Bu şekilde o, jurnalistlerge Pskov vilâyet şurasınıñ deputatı Artur Gayduknıñ «qısmiy» seferberlik buyruğı çalışmağa devam etkeninen bağlı muracaatına Rusiye prezidentiniñ memuriyeti bergen cevapnı izaatladı. 2022 senesi noyabr ayında o, Vladimir Putinge muracaat etip, «qısmiy» seferberlikni bitirüv fermanını neşir etmege teklif etti.
Peskovnıñ aytqanına köre, «qısmiy» seferberlik çerçivesinde askerlikke aluv Rusiye Silâlı quvetleriniñ berilgen vazifelerni yerine ketirmesi içün kerekli sayığa irişilgenine qadar devam etecek. Onıñ bildirgenine köre, Rusiye Mudafaa nazirligi belgilengen raqam bar, şunıñ içün «qısmiy» seferberlik çerçivesinde askerlikke aluv yekünlendi, dep esabat berdi.
«Vatandaşlarnıñ arbiy hızmetke alınmasından ğayrı, qısmiy seferberlik Silâlı quvetler vazifeleriniñ yerine ketirilmesi içün kerekli diger tedbirler, hususan arbiylerniñ vazifelerini yerine ketirüv ve ilâhre bar. Bu ceetten çalışmağa devam ete», – dep ayttı Rusiye prezidentiniñ matbuat hızmeti.
Jurnalistlerden biri angi «diger tedbirler» aqqında aytıla añlatmağa rica etti. Dmitriy Peskov böyle cevap berdi: «Añlatamam. Gizli maddenen de bağlı ve ilâhre. Qısmiy seferberlik boyunca askerlikke aluvnı aytsaq, bu esnas yekünlendi. Mında daa bir Kere Rusiye prezidentiniñ aytqanları ve beyanatlarına esaslanmağa teklif etem. Buyruqnıñ Mudafaa nazirligi içün kerek olğan diger vazifeleri de bar».
Rusiyede «qısmiy» seferberlik (Rusiye prezidenti Vladimir Putinniñ buyruğında resmiy adı bu) 2022 senesi sentâbrniñ 21-nde ilân etildi. Rusiye Federatsiyasınıñ Mudafaa nazirligi 300 biñ insannı seferber etmege niyeti bar, dep bildirgen edi. Bıltır oktâbr ayınıñ soñunda Rusiye Mudafaa naziri Sergey Şoygu Putinge bu vazife yerine ketirildi ve qoşma bir şey planlaştırılmay, dep bildirdi.
Putin bu buyruqnı öyle de imzalamadı. Oktâbrniñ 31-nde imzalamağa kerek barmı «tüşünmedi» dep bildirdi ve uquqçılarnen «laf etmege» vade etti. Rusiye Federatsiya Şurasınıñ anayasa qanunları ve devlet quruluvı komitetiniñ yolbaşçısı Andrey Klişas «qısmiy» seferberlikni yekünleycek qoşma vesiqalar talap etilmey, dep bildirdi.
Times Britaniya gazetası ğarbiy istihbarat menbalarınıñ malümatına esaslanıp, Rusiyede yaqın aftalarda daa 500 biñ insan seferber etilecek, dep yazdı. Yañı yıldan soñ Rusiyede seferberlik devam etecegini Ukrayına istihbaratı da bildirgen edi.
